Վրաստանում կորոնավիրուսի պատճառով «չոր օրենք» է սահմանվել. Интерфакс
Վրաստանում մարտի 31-ից մինչև ապրիլի 21-ը սահմանված արտակարգ դրության ռեժիմի ընթացքում արգելվել է ալկոհոլի վաճառք իրականացնող բոլոր կետերի գործունեությունը: Ինչպես փոխանցում է Интерфакс-ը, այս մասին ասվում է կառավարության որոշման մեջ:
Նշվում է, որ արգելքը տարածվում է նաև գարեջրի և գինու վրա: Ռեստորաններին և այլ հասարակական վայրերին ու կազմակերպություններին այս ընթացքում թույլատրվում է աշխատել միայն առաքում կատարելու պայմանով: Հաճախորդների ընդունել չի թույլատրվում:
Մարտի 31-ից երկրում համընդհանուր կարանտին է սահմանվել: Մարդկանց արգելվում է միևնույն վայրում հավաքվել 3 հոգուց ավելի քանակով: Բացառություն են կազմում մթերային խանութները, բանկերն ու դեղատները, որտեղ պետք է պահպանվի անհրաժեշտ հեռավորությունը:
Բացի այդ, 21:00-ից առավոտյան 06։00-ն պարետային ժամ է հայտարարվել:
Մարտի 31-ի դրությամբ՝ Վրաստանում կորոնավիրուսով վարակվել է 110 մարդ, որոնցից 21-ն ապաքինվել են: