Վարչապետն ու իմքայլականները ծանր հարված հասցրին Հայկ Մարությանին
Երեւանի քաղաքապետի պաշտոնը վարչապետ Նիկոլ Փաշինյանի թեթեւ ձեռքով զբաղեցրած Հայկ Մարությանը հայտնվել է ծանր վիճակում: Ընդ որում, այդ վիճակին նրան հասցրել է ոչ այնքան Երեւանի ավագանիի «Լույս» խմբակցության ղեկավար Դավիթ Խաժակյանը, որքան վարչապետ Փաշինյանն ու իմքայլական պատգամավորները:
Եւ Նիկոլ Փաշինյանը, եւ Ազգային ժողովի իմքայլական պատգամավորները կուրծք ծեծելով ընդդիմացան Երեւանի քաղաքապետարանի ստացած կասկածելի նվիրատվությունների իրավաչափությունը ստուգելու նպատակով ԱԺ–ում քննիչ հանձնաժողովի ստեղծման առաջարկին։
Ընդ որում, այնպիսի կրքոտությամբ էին մերժում առաջարկը, որ նույնիսկ այս հարցում անտարբեր մարդկանց մոտ հարցեր առաջացան, որոնցից առաջնայինը հետեւյալն է՝ լավ, որ ամեն ինչ նորմալ է, որ խնդիր չկա, ինչո՞ւ են դպրոցական երեխայի համառությամբ հրաժարվում օրագիրը ներկայացնել ծնողին:
Զավեշտ էր այն հիմնավորումը, որով իմքայլականները եւ նրանց առաջնորդը մերժում էին խորհրդարանական ընդդիմության առաջարկը: Այստեղ մնում է նրանց հիշեցնել, բացատրել, որ Երեւանի ավագանին կամ քաղաքապետարանի որեւէ վարչություն չի կարող որոշել, թե Ազգային ժողովը կարող է այս կամ այն հարցով քննիչ հանձնաժողով ստեղծել, թե՝ ոչ: Այդ լիազորությունը չունի նաեւ ՀՀ արդարադատության նախարարությունը, որքան էլ որ այն ղեկավարի զինծառայությունից խուսափած երիտասարդ նախարարը:
«ԿամԱԶգեյթը» հանրությանը, քաղաքական շրջանակներին հուզող հարց է, որը պարզաբանման կարիք է զգում: Բնականաբար, սա հենց այն հարցն էր, որի լուծման համար էլ պետք է ձեւավորվեր քննիչ հանձնաժողով: Մեկ հիշեցում եւս, քննիչ հանձնաժողովը կարող է քննել ինչպես պետական, այնպես էլ տեղական ինքնակառավարման մարմիններին առնչվող հարցեր։
Եւ այսքանից հետո ինչպես չմտածել, որ վարչապետը, իմքայլականները, ՔՊ-ականները թաքցնելու բան ունեն, անհանգստանալու առիթ ունեն: Վարչապետը եւ իմքայլականները որոշեցին Հայկ Մարությանին հեռու պահել տհաճություններից, բայց նրան ծանրագույն հարված հասցրին: Հիմա արդեն ով չէր կասկածում, սկսեց կասկածել, որ նվիրատվությունների հիմքում կոռուպցիոն ռիսկեր են եղել, եւ որ գոնե ամեն ինչ չէ, որ եղել է օրենքի սահմաններում:
Եթե դուք իրոք համոզված եք, որ ամեն ինչ մաքուր է եղել կամ ինչպես ձեզնից ոմանք են պնդում՝ արդար է եղել, ապա այդ դեպքում դուք պետք է շտապեիք ստեղծել այդ քննիչ հանձնաժողովը՝ ձեր ընկերոջ, գործընկերոջ երեսը պարզելու համար: Իսկ հիմա Հայկ Մարությանը հայտնվեց, մեղմ ասած, տհաճ իրավիճակում:
ՀՀ շարքային քաղաքացին արդեն իսկ եզրակացրել է՝ Մարությանը, նրան հովանավորող իմքայլականները եւ վարչապետը հաստատ հանրությունից թաքցնելու բան ունեն:
Ստեղծեիք հանձնաժողովը, թող մանրամասն ստուգեր, քններ, եւ, եթե վստահ էիք, որ ամեն ինչ եղել է օրենքի սահմաններում, ապացուցեիք դա, իսկ հետո հպարտորեն համբուրեիք ձեր սիրելի քաղաքապետի ճակատը, իսկ ընդդիմությանն էլ ապացուցեիք ձեր ճշմարտացիության մեջ: Ի վերջո ավելի լավ չէ՞ր լինի, եթե Մարությանը պատասխաներ պատգամավորների, քննիչ հանձնաժողովի անդամների հարցերին, քան ամիսներ հետո արդեն համապատասխան մարմինների հարցերին, բոլորովին այլ սենյակում:
Ամեն ինչ արեցիք, որ Կարգին Հայկոն մի օր ասի՝ մեզ համար «ԿամԱզ»-ում լռված հանգիստ գնում էինք, ինչու իջանք ու այս մոտոն նստեցինք:
Հակոբ Ասատրյան
Top-News.am