Առողջության հարկը հանգեցնելու է սոցիալական պառակտման. գրանցված աշխատողների հաշվին լավություն են անում ստվերում աշխատողների՞ն. փաստաբան
Առողջության հարկը նոր ծանր բեռ է դնելու քաղաքացիների ուսերին: Tert.am-ի հետ զրույցում այս տեսակետը հայտնեց փաստաբան Վահե Աստվածատրյանը:
Փաստաբանի կարծիքով՝ նախագիծը խնդրահարույց է մի քանի առումով. այն հանգեցնելու է սոցիալական պառակտման և բիզնես միջավայրի ոչնչացման:
«Չգրանցված աշխատողները Հայաստանում մեծ թիվ են կազմում: Ունենք պետություն, որտեղ կա շուրջ 70 % ստվեր, ու դրա պարագայում առողջության ապահովագրություն ենք մտցնում: Բայց ո՞ւմ հաշվին, մնացած գրանցված 30%-ի՞: Մեր հաշվին լավություն են անում մյուսների՞ն: Հենց այստեղ ենք բախվում սոցիալական պառակտման հավանականությանը»,-ասաց փաստաբանը՝ նշելով, թե առանց այդ էլ՝ գրանցված աշխատակիցները ստվերի 70%-ի համար տարատեսակ վճարումներ են անում:
«Այո՛, այդ 70%-ի մեջ կան նաև ծայրահեղ կարիքավոր մարդիկ, կան պետության հոգածության տակ գտնվող անձինք, բայց պետք է ֆիլտրել, հասկանալ՝ նրանք ո՞ր մասն են կազմում: Գրանցված աշխատակիցներն իրենց հարկերի հաշվին պահում են բանակը, պետական ապարատի աշխատողներին, այդ թվում՝ նախարարներ ու պատգամավորներ, դատավորներին և այլն: Այս դեպքում այդ հարկի ավելացումն անհասկանալի է»,-ասաց Աստվածատրյանը՝ նշելով նաև, թե «մեդալի հակառակ կողմն» էլ կա՝ հայտնի չէ, թե ծառայություններն ինչ որակով կիրականացվեն:
Նա հիշեցրեց նախագծի հիմնավորումներից մեկը, ըստ որի՝ եկամտային հարկը նվազում է. 2023թ.-ից դառնալու է 20%, և ստացվում է, թե աշխատողի վրա քիչ պարտականություններ են դնում, ապա հավելեց՝ նախագծով բեռը ոչ միայն նույնն է դառնում, այլ մի բան էլ ավելանում է:
Աստվածատրյանը նշեց, թե ստվերի դեմ պետք է պայքարել՝ հարկերը նվազեցնելով, բայց մեր երկրում հակառակ պրոցեսն է:
«Առանց այդ էլ՝ մեզ մոտ բիզնես միջավայրը դժվար է «շնչում», ու մրցակցությունը շատ անբարեխիղճ է, իսկ այս նախագծով հենց ստվերում աշխատողների համար են բարեխիղճ պայմաններ ստեղծելու: Փոխանակ այնպես անեն, որ մեծամասնությունը գա հարկային դաշտ, այնպես են անում, որ էլ ավելի խուսափի»,-ամփոփեց փաստաբանը:
Նշենք, որ իրավական ակտերի նախագծերի հրապարակման միասնական կայքում հրապարակվել է նախագիծ, որով կառավարությունը նախատեսում է 2022 թվականից ներդնել առողջության համապարփակ ապահովագրության համակարգ: Նախատեսվում է սահմանել նոր հարկատեսակ, այսպես կոչված՝ առողջության ապահովման հարկ: Հարկատեսակի չափը, ըստ նախագծի, պետք է սահմանվի 6 տոկոս: Այսինքն՝ յուրաքանչյուր գրանցված աշխատող ամսական իր աշխատավարձից 6 տոկոս կվճարի առողջապահության հարկ: