Հայրենիքիս 25 ամյա անկախությունն ու հայրենակիցներիս՝ Ռուսաստանից հավերժ կախվածությունը
Այսօր Շուշիի ազատագրման օրն է: Շուշիի ազատագրման ռազմական գործողությունը տեղի է ունեցել 1992 թվականի մայիսի 8-9-ին: Ռազմական գործողության ելքը կանխորոշվել էր արդեն իսկ մայիսի 8-ին, երբ գլխավոր հարավային ուղղության՝ Լաչինի եւ մյուս երեք ուղղությունների ստորաբաժանումները նպաստավոր բնագծեր էին գրավել Շուշիի մատույցներում: Մայիսի 8-ի երեկոյան տրված դադարը հակառակորդին հնարավորություն է ընձեռել հատկացված միջանցքով հեռանալ բերդաքաղաքից: Մայիսի 9-ին արդեն Շուշին ազատագրված էր:
Շուշիի ազատագրման մարտերում հայկական կողմն ունեցել է 57 զոհ, թշնամին՝ 250-300 սպանված, 600-700 վիրավոր, 13 գերի:
Շուշիի ազատագրման 25-րդ ամյակի օրը փորձեցինք գյումրեցիներից հետաքրքվել, թե արդյո՞ք մենք ունենք բավարար միջոցներ՝ մեր ազատագրած տարածքները պահպանելու համար: Մեր զրուցակիցները հակված էին այն կարծիքին, որ Հայաստանը իր եւ Արցախի անկախությունը պահպանելու առումով պետք է միշտ Ռուսաստանին ընդունի որպես իր դաշնակից երկիր:
«Ես չգիտեմ մենք ուժ ունե՞նք, որով կկարողանանք պահպանել մեր գրավածը, թե՝ չէ: Սովորական ժողովուրդը չիդե, թե մենք ի՞նչ զենքեր ունենք։ Մենք Խաչատուր Աբովյանից խելացի մարդ ունեցե՞լ ենք: Ինքը ասել է՝ օրհնվի էն օրը, երբ ռուսի ոտը կեղնի մեր հողի մեջը: Առանց ռուսի էս 2 միլիոնանոց ազգը չի կարող գոյատեւել»,- ասաց մեր զրուցակիցներից մեկը:
Այնուհետև, մեր զրուցակիցներին, որպես այլընտրանքային տարբերակ, հիշեցրեցինք արեւմտյան գերտերությունների մասին:
«15 թվականին ու՞ր էին արեւմտամետ ուժերը, երբ թուրքը ջարդ էրավ: Միլիոն ու կես ազգին ջարդեցին Ամերիկայի, Անգլիայի, Ֆրանսիայի, Գերմանիայի աչքի դեմը»:
ԵԱՀԿ երեւանյան գրասենյակի փակումն էլ, կարծես թե, այնքան էլ չի հուզում մեր քաղաքացիներին: Նրանց կարծիքով՝ ԵԱՀԿ գրասենյակը ոչ մի նպաստավոր քայլ չի ձեռնարկել Հայաստանի համար:
«Ըսքան վախտ մենք չիդեինք, թե ԵԱՀԿ-ի գրասենյակը կար, թե՝ չկար: Ի՞նչ կեներ որ, հային ի՞նչ օգուտ տվեց: Վրաստան ու Ադրբեջան արդեն փակվել է, թող ստեղ էլ փակվի, ի՞նչ կեղնի: Մեզի պետք է, որ մեր ղեկավարությունը էս երկրին տեր էղնի, թե չէ ԵԱՀԿ-ն մեզի ի՞նչ»:
Անդրադառնալով «եղբայր» Ռուսաստանին, եւ մեր անմիջական թշնամի Ադրբեջանին միլիարդավոր արժեքով զենքի վաճառքին, գյումրեցիներից հետաքրքվեցինք, թե ի՞նչ կարծիք ունեն այն մասին, որ դաշնակից երկիրը նման քայլի է դիմում:
«Ադրբեջանին փողով կուդա, մեզի՝ ձրի, ինչ-որ Ադրբեջանը ունի, էն էլ մենք ունինք»,-եզրափակեցին նրանք:
Անկախ դաշնակից երկրների աշխարհագրական դիրքից, պետք է նշենք, որ Հայաստանը պատրաստ է պաշտպանել իր ազատությունը եւ սահմանները: Մենք ունենք 25-ամյա պատմություն եւ ուժեղ բանակ, որի շնորհիվ ընդամենը մեկ տարի առաջ 100 եւ ավելի հայորդիների շնորհիվ կարողացանք պահպանել մեր երկրի սահմանները:
Դավիթ Գասպարյան