Միլիարդատեր Բերոն Հիլթոնը մահացել է՝ գրեթե ոչինչ չթողնելով իր ընտանիքին
Լոս Անջելեսում 91 տարեկան հասակում մահացել է Hilton հյուրանոցների ցանցի սեփականատեր Բերոն Հիլթոնը: Այս մասին իր թվիթերյան էջում հայտնել է նրա թոռնուհի Փերիս Հիլթոնը՝ կից հրապարակելով իրենց համատեղ ընտանեկան լուսանկարները:
«Նա լեգենդ էր, երազող, պայծառ, գեղեցիկ, բարի. ձեռքբերումներով ու արկածներով լի կյանք է ապրել»,- գրել է Փերիսը՝ հավելելով, որ մանկուց օրինակ է վերցրել գործարար պապիկից:
Բերոնը հյուրանոցների ցանցի հիմնադիր Կոնրադ Հիլթոնի որդին էր: 30 տարի նա զբաղեցրել է Hilton Hotels Corporation-ի գլխավոր տնօրենի պաշտոնը: Իր աշխատանքային գործունեության ընթացքում նա մեծացրել է հյուրանոցների թիվն ու միլիարդատեր դարձել:
Ինչպես հաղորդում է РИА Новости-ն, 2007-ին Բերոնը հայտարարել է, որ կգնա իր հոր հետքերով՝ իր 2.3 մլրդ դոլար գնահատվող կարողության 97 տոկոսը թողնելով «Կոնրադ Հիլթոն» հիմնադրամին: Այդպիսով, նա իր ընտանիքի անդամներին զրկել է իր կարողությանը հավակնելու հնարավորությունից: