«Թրամփը ողջագուրվում է այն դիկտատորների հետ, ովքեր շահարկում են նրա փառամոլությունը»
Երեկ Հյուսթոնում տեղի է ունեցել 2020 թվականի նախագահական ընտրություններում դեմոկրատական կուսակցության կողմից թեկնածու առաջադրվելու հավակնորդների երրորդ հանրային բանավեճը:
Քննարկված առանցքային հարցերի թվում էին ռասայական խտրականությունը, զենքի հսկողությունը և առողջապահությունը:
Առավել թեժ վեճ էր ծավալվել առաջատար հավակնորդ համարվող նախկին փոխնախագահ Ջո Բայդենի և երկրորդ վարկանիշն ունեցող սենատոր Էլիզաբեթ Ուորրենի միջև: Վարկանիշով երրորդը սենատոր Բերնի Սանդերսն է համարվում:
Բոլոր հավակնորդները երեկ խստորեն քննադատել են հանրապետական նախագահ Դոնալդ Թրամփին:
«Աշխարհի դեմոկրատիաները հավատում են, որ Ամերիկան պետք է պաշտպանի մեզ բոլորիս միավորող արժեքները, բայց Թրամփը, կարծես, մյուս թիմից է և ողջագուրվում է այն դիկտատորների հետ, ովքեր շահարկում են նրա փառամոլությունը»,- ասել է Բայդենը:
Նա հայտարարել է, որ հաղթելու դեպքում մեկ տարում ԱՄՆ-ում կգումարի գագաթնաժողով, որով Ամերիկան կվերահաստատի հավատարմությունը դեմոկրատիայի արժեքներին:
«Այն առաջնորդներն, ովքեր կմասնակցեն գագաթնաժողովին, պետք է պատրաստ լինեն համագործակցել ու կոնկրետ քայլերով պայքարել կոռուպցիայի դեմ և իրենց երկրներում առաջ տանել մարդու իրավունքների պաշտպանությունը»,- ասել է Բայդենը: