Փոխհրաձգություն, որի հետեւանքով զինծառայող է վիրավորվել
Տավուշի մարզում պայմանագրային զինծառայող է վիրավորվել։ ՊՆ մամուլի ծառայությունից հայտնում են, որ այսօր՝ հուլիսի 27-ին, ժամը 11.00-ի սահմաններում, ՀՀ պետական սահմանի հյուսիսարևելյան հատվածում` Տավուշի մարզում, արձանագրվել է հակառակորդի կողմից հրադադարի խախտման հերթական դեպքը, ինչի հետեւանքով հրազենային վիրավորում է ստացել մարտական հերթապահություն իրականացնող ՀՀ ԶՈՒ պայմանագրային զինծառայող: Վիրավոր զինծառայողի կյանքին վտանգ չի սպառնում:
Իրավիճակի լարման ամբողջ պատասխանատվությունը կրում է ադրբեջանական կողմը, համոզված են ՀՀ պաշտպանության նախարարությունում:
Իսկ ահա ադրբեջանական կողմը հայտնում է, թե հայ դիպուկահարները կրակել են ադրբեջանական դիրքերի ուղղությամբ:
Տեղեկատվության համաձայն, Հայաստանի զինված ուժերի դիպուկահարները կրակ են բացել «ԿամԱԶ» ռազմական բեռնատարի վրա, որը մարտական դիրքերից հեռու է գտնվել: Փամփուշտներից մեկը մեքենայի առջեւի դիմաապակուն է կպել:
Հայաստանի եւ Ադրբեջանի պաշտպանության նախարարությունները միաժամանակ հայտնում են, որ իրենք լիովին վերահսկում են իրավիճակը:
Top-News.am