Վրաստանի ԱԳ նախարարը ողջունել է Պուտինի հայտարարությունը
Վրաստանի ԱԳ նախարար Դավիթ Զալկալիանին ողջունել է ՌԴ նախագահ Վլադիմիր Պուտինի՝ Վրաստանի նկատմամբ պատժամիջոցներ չկիրառելու ցանկությունը և այդ որոշումը ճիշտ է անվանել:
«Ռուսաստանի նախագահի որոշումը Վրաստանի դեմ պատժամիջոցներ չսահմանելու մասին միանշանակ համարվում է միակ և ճիշտ որոշումը: Այն կարելի է միայն ողջունել», - ТАСС գործակալության փոխանցմամբ՝ այս մասին վրաց նախարարն ասել է «Իմեդի» հեռուստաընկերության եթերում:
Զալկալիանին ընդգծել է, որ Վրաստանի իշխանությունները ուշադիր հետևել են այն հայտարարություններին, որոնք հնչել են Թբիլիսիից ռուսաստանյան իշխանությունների հասցեին՝ դրանք բնութագրելով որպես սադրիչ և ուղղված երկկողմ հարաբերությունների վատթարացմանը:
ՌԴ Պետդուման հուլիսի 9-ին միաձայն հայտարարություն է ընդունել, որով դատապարտել է հակառուսական սադրանքները Վրաստանում և կառավարությանն, ապա նաև նախագահին առաջարկել է դրանց պատասխանել տնտեսական միջոցներով:
Պուտինն, իր հերթին, հայտարարել է, որ ելնելով վրաց ժողովրդի նկատմամբ հարգանքից և հանուն Վրաստանի հետ երկկողմ հարաբերությունների պաշտպանության՝ չարժի հանրապետության նկատմամբ պատժամիջոցներ սահմանել: