Վրաստանի իշխող կուսակցությունը ՆԳ նախարարից «ազատվելու» մտադրություն չունի
Վրաստանի խորհրդարանի փոխխոսնակ և խորհրդարանի նախագահի պաշտոնակատար Թամար Չուգոշվիլին հայտարարել է, որ «Վրացական երազանք» կուսակցությունը չի կարծում, թե երկրի ներքին գործերի նախարար Գեորգի Գախարիան քաղաքական պատասխանատվության է կրում Թբիլիսիում ընթացող դեպքերի համար, գրում է apsny.ge-ն:
Նրա խոսքով՝ մայրաքաղաք Թբիլիսիում իրականացված զանգվածային ցույցերի ժամանակ ուժի կիրառման առնչությամբ հետաքննություն կսկսվի, և կդրվի կոնկրետ անձանց իրավական պատասխանատվության ենթարկելու հարցը:
Նշենք, որ ՆԳ նախարար Գախարիայի հրաժարականը Թբիլիսիի Ռուստավելի պողոտայում արդեն 4-րդ օրն իրականացվող ցույցերի մասնակիցների հիմնական պահանջներից է: Ի սկզբանե ցուցարարները պահանջում էին նաև խորհրդարանի խոսնակ Իրաքլի Կոբախիձեի հրաժարականը, որը ցույցերի ֆոնին արդեն վայր է դրել լիազորությունները:
Հիշեցնենք, որ Վրաստանում արդեն մի քանի օր է՝ իշխանության գործունեության դեմ բողոքի ակցիաներ են անցկացվում: Այսօր երեկոյան ևս բողոքի ակցիա է նախատեսված։
Հունիսի 20-ին Թբիլիսիում բողոքի զանգվածային ակցիաները սկսվել էին ՌԴ պետդումայի պատգամավոր Սերգեյ Գավրիլովի ելույթի պատճառով, որը ներկա էր եղել Վրաստանում անցկացվող Ուղղափառության միջխորհրդարանական վեհաժողովի նիստին: Նիստի մեկնարկից հետո նա նստել էր խորհրդարանի խոսնակի աթոռին և հավաքվածներին ռուսերենով ուղերձ հղել:
Ոստիկանությունը ցուցարարների նկատմամբ արցունքաբեր գազ, ռետինե փամփուշտներ և ջրցան մեքենաներ է կիրառել: Ցույցերի ընթացքում, apsny.ge կայքի տվյալներով, ավելի քան 240 մարդ տարբեր վնասվածքներով հիվանդանոց է տեղափոխվել: