Ինչպես են հայերն օգնել Մարիինյան թատրոնի ղեկավարին երաժշտական կարիերա կառուցել (տեսանյութ)
ՌԴ ժողովրդական արտիստ, Սանկտ Պետերբուրգի Մարիինյան թատրոնի գեղարվեստական ղեկավար, խմբավար Վալերի Գերգիևը Առաջին ալիքով ցուցադրվող «Երեկոյան Ուրգանտ» հաղորդման ժամանակ պատմել է, թե ով է իրեն օգնել երաժշտական կարիերա սկսել:
Հայ հարևանի՝ Յուրի Արզումանովի խորհրդով Գերգիևի ծնողներն իրեն երաժշտական դպրոց են ուղարկել, սակայն այնտեղ ապագա խմբավարի մոտ ռիթմի զգացողություն չեն հայտնաբերել: Գերգիևի հայրն այդ մասին պատմել է իր հայ ընկերոջը՝ կոմպոզիտոր Լեոն Դավիդովին, որը զանգահարել է երաժշտական դպրոցի տնօրենին, որը նույնպես, ինչպես պարզվել է, հայ է եղել՝ Հակոբյան ազգանունով:
Ինչպես հաղորդում է Rusarminfo-ն, հաղորդավար Իվան Ուրգանտը նկատել է, որ Գերգիևի պատմության մեջ միանգամից երեք կերպար հայ են եղել:
«Հետագայում ես 27 տարեկանում դարձել եմ Հայաստանի պետական նվագախմբի գլխավոր խմբավարը: Բոլորը կարծում են, որ ես ամբողջովին պատկանում եմ Մարիինյան թատրոնին, և դա այդպես է, սակայն ես 4 տարի որպես խմբավար աշխատել եմ Երևանում: Դա հսկայական կյանքի փորձ էր ինձ համար: Ինչպես ինձ այն ժամանակ ասացին, եթե «100 հայերի ես ղեկավարում», ապա քեզ ոչինչ չի կարող վախեցնել», - պատմել է Գերգիևը: