Դատավորի ինքնաբացարկի միջնորդությունը նպատակ ունի վեր հանել դատարանի կանխակալ վերաբերմունքը. Հովհաննես Խուդոյան (տեսանյութ)
Միջնորդությունը վերաբերում է երեկ դատավորի կողմից թույլ տված երկու գործողություններին: Այս մասին Քոչարյանի գործով դատական նիստից հետո լրագրողների հետ զրույցում ասաց Քոչարյանի պաշտպաններից Հովհաննես Խուդոյանը:
«Առաջինը՝ անհարկի անընդհատ դատավարության մասնակիցներին ու հատկապես պաշտպաններին ընդհատում էր, թույլ չէր տալիս ներկայացնել առարկություններ, դիրքորոշումներ և ընդմիջումից հետո եկավ ու հանկարծակի սկսեց հակառակ դիրքորոշում ներկայացնել: Հարց է առաջանում՝ եթե մենք դրա իրավունքը ի սկզբանե ունեինք, ինչո՞ւ դատարանը հենց սկզբից թույլ չէր տալիս: Այսինքն՝ դատարանի կողմից նախապես ստեղծվեց այդ կոնֆլիկտը, երբ անհարկի սահամանափակումների կարիք չկար»,- ասաց Խուդոյանը:
Պաշտպանի խոսքով՝ երկրորդ մասը վերաբերում էր նրան, որ իրենց մինչև հիմա չի պարզաբանվում, թե ինչ ընթացակարգով պետք է այս վարույթը քննվի: Ըստ նրա՝ դատարանը խուսափողական պատասխաններ է տալիս, հռետորական հարցերով է պատասխանում:
«Մենք ունենք օրենսդրական կանոններ և ընդամենը խնդրում ենք դատարանին ասել՝ շարժվում ենք այս կանոնով: Մենք չենք ասում, որ ասի ինչ ակտ է կայացնելու, մենք ասում ենք՝ ինչ ակտեր կարող է կայացնել ինքը, որովհետև մի դեպքում այդ ակտերի շրջանակը այլ է, մյուսում՝ այլ: Այսինքն, մի պրոցեսում մենք այլ իրավունքներ ու պարտականություններ ունենք, մյուսին՝ մեկ այլ:
Հիմա եթե սպորտային մենամարտի մասնակցություն լինի ու կողմին ասում են պետք է մասնակցես, բայց չեն ասում կանոնները... հիմա մենք, եթե կանոնները չգիտենք, ինչպե՞ս պետք է մասնակցենք: Հետո՝ արդյո՞ք դատարանը մեզ չի զրկելու այնպիսի իրավունքներից, որոնք եթե նախապես կանխորոշեր, չէր կարող զրկել»,- ասաց Խուդոյանը:
Tert.am-ի դիտարկմանը՝ գլխավոր դատախազը կարծում է, որ Ռոբերտ Քոչարյանն իր ելույթում փորձել է ճնշում գործադրել նախագահող դատարանի վրա, Խուդոյանն ասաց. «Մենք առաջին դատական նիստերից սկսած ներկայացնում ենք իրավական դիրքորոշում, որ այս գործը ապօրինի քրեական հետապնդում է, և բոլոր պաշտոնատար անձինք ապագայում ենթարկվելու են պատասխանատվության այդպիսի ապօրինի գործողությունների համար: Հիմա եթե իրավական պատասխանատվության հնարավորությունը գլխավոր դատախազը և այլ պաշտոնատար անձիք դիտարկում են որպես սպառնալիք, այո՛, կարող ենք արձանագրել, որ դա սպառնալիք է, բայց նույն պահին պետք է արձանագրենք, որ գլխավոր դատախազությունը ՀՀ-ում բոլոր քրեական գործով անցնողներին սպառնում է, դա լուրջ մոտեցում չէ»,- ասաց նա:
Tert.am-ի այն հարցին էլ՝ 12:30-ի նիստի՞ն էլ չի մասնակցելու Ռոբերտ Քոչարյանը և առհասրակ, ինչո՞վ է պայմանավորված նրա արդեն երկու օր է նիստերին չմասնակցելը, Հովհաննես Խուդոյանը պատասխանեց. «Չմասնակցելը պայմանավորված է նրանով, որ նախագահող դատավորի վերջին օրերի գործողությունները վստահություն չեն ներշնչում դատարանի հանդեպ: Եթե դատարանն անհրաժեշտ համարի, որ նա պետք է մասնակցի, նախ դա կլինի որոշակի քննարկման առարկա՝ քննության ընթացքում դատավարության մասնակիցները չունեն պարտականություն ներկայանալու: Այնուամենայնիվ, ասել ենք, եթե դատարանը կգտնի, որ անհրաժեշտ է՝ կներկայանա, սակայն դրանից հետո արդեն առանձին գնահատականի կարժանանա դատավորի այդ դիրքորոշումը»:
Խուդոյանը նշեց՝ հաշվի առնելով այն փաստը, որ նախորդ ինքնաբացարկի միջնորդությունները դատարանը մերժել է, հավանաբար սա էլ կմերժի: «Մեծ հավանականությամբ այս միջնորդությունն էլ է մերժելու, սակայն դա չի նշանակում, որ մենք ժամանակ ենք շահում: Միջնորդությունը ինքնանպատակ չէ, միջնորդությունը նպատակ ունի վեր հանել դատարանի կանխակալ վերաբերմունքը: Եթե վերջնական դատական ակտ կայացնելուց հետո բողոքարկվի, այն բոլոր ինքնաբացարկները ևս կարող են այդ բողոքներում տեղ գտնել»,- նշեց նա: