Իսկ ե՞րբ մտքի դար չի եղել
Նիկոլ Փաշինյանն ասել է եւ գրեթե բոլոր ՔՊ-ականները, այդ թվում մեծ եւ փոքր պաշտոնյաները կրկնում, իրենց ֆեյսբուքյան էջերում գրում են հետեւյալ միտքը.
«Մենք հավատում ենք, որ 21-րդ դարը հայ ժողովրդի դարն է լինելու: Երբ ծովի դար էր, մենք ծով չունեինք, երբ նավթի դար էր, մենք նավթ չունեինք, երբ բախտի դար էր, մենք բախտ չունեինք, երբ ուժի դար էր, մենք ուժ չունեինք, ահա եկել է մտքի դարը, եւ որեւէ կասկած չկա, որ մենք ունենք միտք եւ մեր հիմնական անելիքը բնորոշված է: Մենք պետք է պայմաններ ստեղծենք, որ միտքը ինքնադրսեւորվելու, իրացվելու հնարավորություն ունենա»:
Մտահոգիչ է, որ Նիկոլ Փաշինյանի կուսակիցները, մերձավորները նրան փորձում են վերածել Լեոնիդ Իլյիչ Բրեժնեւի: Մտահոգիչ է, որ նա չի կանխում այս քայլերը: Տխուր է, երբ չեն նկատում, թե ինչպես են կրկնում այն ամենը, ինչ եղել է խորհրդային պետությունում:
Ինչ վերաբերում է բուն մտքին, ապա ախարհի արարման հենց սկզբից «մտքի դար» է եղել: Երբ չես գիտակցում այս պարզ ճշմարտությունը, ապա հետագա խնդիրներն ու անհաջողությունները երաշխավորված են:
Մտքի դար է եղել, երբ ծովի դար է եղել: Մտքի դար է եղել, երբ նավթի դար էր: Նույնպես մտքի դար էր, երբ ուժի դար էր, եւ անգամ երբ բախտի դար էր, կրկին մտքի դար էր:
Առանց մտքի հնարավոր չէր ծովի տիրակալ դառնալ եւ նոր երկրներ հայտնաբերել, նվաճել, երբ նավթի դար էր, հնարավոր չէր այն հայտնաբերել, արդյունահանել, օգուտ քաղել, եեթե միտք չլիներ: Նույնիսկ բախտի եւ ուժի դարաերում իշում էին նրանք, ովքեր միտք ունեին:
Ի՞նչ էին անելու Կյուրոսը, Ալեքսանդր Մակեդոնացին, Տիգրան Մեծը, Հուլիոս Կեսարը, Նապոլեոնը եւ մյուսներն առանց մտքի: Մի՞թե կարծում եք իսպանացիներն ու պորտուգալացիները, անգլիացիները եւ ֆրանսիացիները նոր երկրներ էին հայտնաբերում որովհետեւ բախտ եւ ուժ ունեին կամ ծով ունեին: Առանց մտքի նրանք այդ ամենը չէին ունենա: Նույնպես անգլիացիներն իրենց հայրենիքից հազարավոր կիլոմետրերով հեռու նավթահանքերին չէին տիրանա առանց մտքի, հույսը դնելով ուժի, բախտի կամ ծովի վրա:
Ժամանակին մենք եւս ունեինք ծով, ուժ, բախտ, անգամ նավթ, բայց դրանք չքացան, քանի որ հավաքական միտք չունեինք: Ազգային եւ պետական հավաքական միտք չունեինք:
Հիմա էլ, երբ մտքի դար է, առանց մտքի հնարավոր չէ բարձր տեխնոլոգիաները ծառայեցնել պետության եւ ժողովրդի շահերին:
Եւ վերջապես, չի կարելի խորհրդային կարգախոսներով ժողովրդին ոգեւորել, հանգիստ նստացնել տեղները, ասելով, թե վերջ, հանգիստ եղեք, արդեն մտքի դար է, մենք միտք ունենք եւ ամեն ինչ լավ է լինելու:
Ի վերջո, միտք ունեցողները չեն վնասում պետությանն իրենց քայլերով, հայտարարություններով: Միտք ունեցողները երկիրը սեւի եւ սպիտակի, սեւազգեստների եւ ծաղկավոր հագուստ կրողների չեն բաժանում, ՔՊ-ն նոր կոմկուսի կամ նմանատիպ այլ կուսակցության չեն վերածում, իրենց առաջնորդի լավ կամ վատ միտքը քոփի փասթ չեն անում եւ տարածում այնպես, ինչպես խորհրդային տարիներին:
Խոսում եւ ձգտում եք նմանվել Արեւմուտքին: Քանի անգամ եք տեսել, որ Մերկելի կամ Թրամփի կուսակիցները, Մակրոնի կամ Մեծ Բրիտանիայի վարչապետի թիմակիցները, մեծ եւ փոքր պաշտոնյաները նրանց խոսքերը տեղադրեն իրենց էջերում՝ հիացական բացականչություններով:
Մեզ իրոք միտք է պետք, որ նեղ անձնական եւ խմբային շահերը վեր չդասենք պետության եւ ազգի շահերից: Երբ այդ միտքը ունենանք, ամեն ինչ աստիճանաբար իր տեղը կընկնի:
Հակոբ Ասատրյան
Top-News.am