Զելենսկիի մասնակցությամբ «Ժողովրդի ծառա» հեռուստասերիալը հեռացվել է YouTube-ից
Ուկրաինական «Ժողովրդի ծառա» հեռուստասերիալը, որում գլխավոր դերը խաղացել է նախկին դերասան և շոումեն, ներկայում Ուկրաինայի նախագահ Վլադիմիր Զելենսկին, հեռացվել է YouTube-ից, հաղորդում է Известия-ն:
Ինչպես նշել է «Студия Квартал 95»-ի տնօրեն Սերգեյ Պուշկինը, որին է պատկանում նաև հեռուստասերիալի հեղինակային իրավունքը, դա ժամանակավոր է արվել: Նրա խոսքով՝ սերիալը նորից հասանելի կդառնա, երբ լուծվեն իրավական հարցերը:
Թե խոսքն ինչ խնդիրների մասին է, Պուշկինը չի նշել: Աղբյուրի հաղորդմամբ՝ «Ժողովրդի ծառա» հեռուստասերիալը հասանելի է ուկրաինական «1 + 1» հեռուստաընկերության կայքում:
«Ժողովրդի ծառա» հեռուստասերիալն էկրան է բարձրացել 2015 թվականին: Այն ուսուցիչ Վասիլի Գոլոբորոդկոյի մասին է, ում դերը խաղացել է Զելենսկին, որը համացանցի աստղ է դառնում այն բանից հետո, երբ աշակերտները համացանցում նրա մասնակցությամբ տեսանյութ են հրապարակում: Հայտնի դառնալուց հետո Գոլոբորոդկոն ընտրվում է Ուկրաինայի նախագահ: