Ֆիրդուսի թաղամասում մեծածավալ աշխատանքները դեռևս չեն մեկնարկում, քանի որ այնտեղ դեռ չիրացված հողատարածքների խնդիրներ կան. Արթուր Մեսչյան
Ֆիրդուսի թաղամասում մեծածավալ աշխատանքները դեռևս չեն մեկնարկում, քանի որ այնտեղ դեռ չիրացված հողատարածքների խնդիրներ կան. այսօր հրավիրված ասուլիսին նշեց Երևանի գլխավոր ճարտարապետ Արթուր Մեսչյանը՝ պատասխանելով Tert.am-ի հարցին, թե ի վերջո ե՞րբ կիրականացվեն մեծածավալ աշխատանքները:
Մեսչյանը նշեց, որ բնակիչների վերաբնակեցման խնդիրները լուծված են: «Ուղղակի հողատարածքների խնդիր կա, որ վերջանական լուծված չէ, այնտեղ բաժանված է լոտերի, որոշ լոտեր արդեն ունեն կառուցապատողներ, որոշների համար դեռ չկան: Մի բան կարող եմ ասել, որ ճիշտ եք՝ երկար տևեց, բայց քանի որ շատ-շատ քանակի մարդիկ են ներգրավված այդ ծրագրում, շատ քանակի մարդկանց համար պետք է բախտորոշիչ որոշումներ կայացվեն, դրա համար հարցը մի քիչ հետաձգեց ժամկետները»,-ասաց նա:
Մեսչյանն ասաց, որ 18 լոտի էր բաժանված Ֆիրդուսի թաղամասը, և հիմնական կենտրոնական լոտերի 80 տոկոսը ձեռք է բերվել, և հողամասերը գրեթե իրացված են, ու ծրագիրը հավանության է արժանացել:
«Լրիվ հողամասերը ձեռք բերելուց հետո կդիմենք նախագծման թույլտվություն ստանալու համար, և որից հետո արդեն կհաստատվի նախագիծը: Կարծում եմ՝ լոկալ, կենտրոնական հատվածի համար միգուցե սկսվի շինարարական աշխատանքը»,-ասաց նա: