Իսրայելի մշակույթի նախարարը հրաժարվել է ներկա լինել «Եվրատեսիլին»
Կառավարության նիստի ժամանակ Իսրայելի մշակույթի և սպորտի նախարար Միրի Ռեգևը հայտարարել է, որ ներկա չի լինի «Եվրատեսիլ-2019» երգի միջազգային մրցույթին, որի պաշտոնական բացման արարողությունը տեղի է ունենում այսօր` Թել Ավիվում: Այս մասին հայտնում է Israelinfo-ն:
«Ինձ հրավիրել են, բայց ես մերժել եմ»,- հայտարարել է նա` հրաժարվելով այլ մանրամասներ հաղորդել:
Մեկ տարի առաջ Ռեգևը շատ էր ոգևորվել Իսրայելի ներկայացուցչի հաղթանակի առիթով և ցանկանում էր ակտիվ մասնակցություն ունենալ կազմակերպչական աշխատանքներին: Նա պնդում էր, որ մրցույթն անցկացվի Երուսաղեմում և շատ այլ բարձրագոչ հայտարարություններ էր կատարում, որոնք նաև քաղաքական բնույթի էին:
Կրքերը հանդարտվեցին, երբ կառավարության իրավական խորհրդատուն նախարարին բացատրեց, որ «Եվրատեսիլն» անցկացվում է ոչ թե կառավարության, այլ եվրոպական անկախ հեռարձակող ընկերության կողմից, և որ մշակույթի նախարարը լիազորված չէ մրցույթի կազմակերպիչներին պայմաններ թելադրել: