Ավտոմեքենաների մաքսատուրքը բարձրանում է, թող էլեկտրամոբիլ ներկրեն. Փաշինյան
ԵՏՄ կարգավորումների շրջանակում մաքսատուրքերի բարձարցումը հետաձգելը բարդ հարց է, որովհետեւ պայմանավորվածությունները կայացվել են եւ տուրքը պետք է բարձրանա: Այս մասին այսօր՝ մայիսի 8-ին, իր մեծ ասուլիսում հայտարարեց ՀՀ վարչապետ Նիկոլ Փաշինյանը՝ անդրադառնալով նրան, որ 2020 թվականի հունվարի 1-ից կտրուկ բարձրանալու են մի շարք ապրանքների, այդ թվում երրորդ երկրներից ներմուծվող ավտոմեքենաների մաքսատուրքերը:
«Գլոբալ առումով նաեւ պետք է պատասխանենք հարցին՝ մենք մեր երկիրը պատկերացնում ենք հին մեքենաների գերեղմանո՞ց, թե՞ պատկերացնում ենք մի երկիր, որտեղից պետք է դուրս գալ էլեկտրամոբիլներ, էլեկտրաավտոբուսներ: Պետք է առաջ գնանք: Տուրքը բարձրանում է, թող էլեկտրամոբիլ ներկրեն:
Այսօր ավտոմեքենա ներկրողներն այնքան մեքենա են ներկրում, որ 7-8 տարի պետք է, որ դրանք վաճառվեն: Մեքենա է, որ ներկրվում է»,-ասաց Փաշինյանը:
Հարցին, թե որքան բյուջեն կտուժի մաքսատուրքերի բարձրացումից, քանի որ կնվազի ավտոմեքենաների ներկրումը, վարչապետը պատասխանեց. «Բյուջեն դրանից չի տուժի, մեր բյուջեի հետ ամեն ինչ նորմալ է, տեսանք, որ մեծ, ամբիցիոզ ծրագրեր ունենք»: