Զուրաբիշվիլիի պաշտոնական այցն ԱՄՆ չեղարկվել է
Վրաստանի նախագահ Սալոմե Զուրաբիշվիլիի՝ աշնանը ծրագրված պաշտոնական այցն ԱՄՆ տեղի չի ունենա, գրում է ՏԱՍՍ գործկալությունը՝ վրացական «Ռուսթավի 2» հեռուստաալիքին հղումով:
Հեռուստաալիքի համաձայն՝ այցը ծրագրվում էր դեռ մարտից, դրանով զբաղվում էր Վրաստանի արտգործնախարարությունը, իսկ այցի չկայանալու պատճառները չեն հաղորդվում:
Այցի ծրագրման լուրն ավելի վաղ հաստատել էր նախագահի աշխատակազմի նախկին ղեկավար Լաշա Ժվանիան, որն օրերս հեռացել է պաշտոնից:
«Մարտին մենք բանակցություններ ենք վարել սեպտեմբերի վերջին կամ հոկտեմբերի սկզբին ծրագրվող այցի վերաբերյալ»,- ասել է Ժվանիան:
Զուրաբիշվիլին հայտարարել էր, որ Վրաստանում ամերիկյան ռազմաբազայի կառուցումն աննպատակահարմար է և կարող է որպես սադրանք ընդունվել: Նա կարևորել էր ԱՄՆ-ի հետ հարաբերությունների խորացումը, սակայն ոչ այլ երկրներին սադրող քայլերով:
Զուրաբիշվիլիի հայտարարությունը Վրաստանի ընդդիմադիր շրջանակներում խիստ բացասաբար էր ընդունվել: Ընդդիմությունը սպառնացել էր պաշտոնանկ անել նախագահին: