Ռիխարդ Վագների ծոռը՝ Անտուան Վագները, Երեւանում կցուցադրի «Արա Գեղեցիկ եւ Շամիրամ» առասպելից ոգեշնչված իր գործը
Լեգենդար կոմպոզիտոր Ռիխարդ Վագների ծոռը՝ նկարիչ եւ վիզուալ արտիատ Անտուան Վագներն, այս օրերին Երեւանում է: Հայտնի նկարիչն ապրիլի 6-ին Հայաստանի Ազգային պատկերասրահում կցուցադրի իր իլյուստրացիան, որը ոգեշնչված է «Արա Գեղեցիկ եւ Շամիրամ» առասպելից եւ Վարդգես Սուրենյանցի համանուն կտավից: Ցուցադրությունը կկայանա ապրիլի 4-ին մեկնարկող «ԱՐԷ» կատարողական արվեստների փառատոնի շրջանակում, որի այս տարվա կիզակետը Գերմանիան է:
Այսօր՝ ապրիլի 3-ին կայացած մամուլի ասուլիսի ժամանակ արվեստագետը խոսեց իր աշխատանքի մասին, ինչպես նաեւ պատասխանեց NEWS.am STYLE-ին հետաքրքրող հարցերին:
Ասուլիսին ներկա էր նաեւ Հայաստանում Գերմանիայի դեսպան Մաթիաս Քիսլերը, որն իր ուրախությունը հայտնեց գերմանական արտիրստներին հայկական փառատոնում ընդգրկելու կապակցությամբ.
«Գերմանական կողմը շատ ուրախ է եւ զգացված, որ այս տարի փառատոնի կենտրոնում Գերմանիան է: Այս փառատոնի շրջանակներում մինչեւ հունիս կանցկացվեն միջոցառումներ. ուրախ ենք, որ դրանց կմասնակցեն նաեւ գերմանացի արվեստագետներ: Նրանցից է նաեւ Անտուան Վագները: Համոզված եմ` նրա արվեստը տարբեր ճյուղերի յուրահատուկ համադրություն է լինելու»,-նշեց նա:
Փառատոնի այս տարվա խորագիրը «Ձախողումն» է: Այն սայթաքո՞ւմ է, թե՞ մի նոր բանի սկիզբ: Հենց այս հարցի պատասխանն էլ արտիստները պետք է ներկայացնեն իրենց գործերում: Նման մի բան փորձելու է անել նաեւ Վագները:
«Ինձ համար մեծ պատիվ է իմ ստեղծագործությունը Հայաստանի Ազգային պատկերասրահում ներկայացնելը: Անհամբերությամբ եմ սպասում այդ օրվան: Իմ աշխատանքի ցուցադրությունը հարմարեցված է պատկերասրահին: Պետք է անդրադռնամ Վարդգես Սուրենյանցի «Արա Գեղեցիկ եւ Շամիրամ» կտավին` դրա իմաստն անցկացնելով ժամանակային հոսանքների միջով: Այս իլյուստրացիան ներկայացվելու է տեխնիկայի եւ արվեստի տարբեր համադրությունների շնորհիվ՝ ձայն, տեսագրություն եւ այլն: Կխոսվի հերոսի սխալականության եւ ինքնության մասին: Չեմ հավակնում ռեժիսոր խաղալ, բայց գեղագիտական տարբեր մոտեցումների եւ մեդիայի շնորհիվ դա կփոխանցեմ հանդիսատեսին»,-ասում է նա:
Արտիստը NEWS.am STYLE-ին պատմեց, որ Հայաստանում արդեն երկրորդ անգամ է.
«6 շաբաթ առաջ առաջարկ ստացա այցելելու Հայաստան եւ ներկայացնելու իմ արվեստը: Քանի որ ես իմ արվեստում շատ մեծ կարեւորություն եմ տալիս բնությանը, պատկերներին, ինձ համար դա առանձնահատուկ թեմա է: Մենք պետք է շրջագայեինք եւ լինեինք Արա լեռան շրջակայքում, բայց ձնաբքերի պատճառով դա չստացվեց եւ կենտրոնացանք Երեւանում: Ցուցադրությունը բաղկացած է շատ մանր բաղադրիչներից, նրբին աշխատանք եւ նրբին մոտեցում էր պահանջում, այդ պատճառով դեռ շատ բան տեսնելու հնարավորություն չեմ ունեցել, բայց հուսով եմ՝ ժամանակ կմնա Հայաստանում շրջելու համար, կտեսնեմ նաեւ հայտնի Սեւանա լիճը եւ այլ գեղեցիկ տեսարաններ»:
Մանրամասները սկզբնաղբյուր կայքում: