Գորբաչովի ստորագրած «Ներողությունն» աճուրդում վաճառվել է 12 մլն ռուբլիով
«Մ. Գորբաչով. Ներողություն» կտավը հանվել է աճուրդի ու վաճառվել 12 մլն ռուբլիով: Ինչպես նշվում է «12-րդ աթոռ» աճուրդի տան ֆեյսբուքյան էջում, վաճառված նմուշն իրենից ներկայացնում է ԽՍՀՄ առաջին և վերջին նախագահի ստորագրությամբ կտավ, որի վրա տպված է մեկ բառ՝ «Ներողություն»:
Կտավի հեղինակը նկարիչ Վ. Իվանովն է:
Նմուշի մեկնարկային գինը եղել է 100 000 ռուբլի, ինչը 120 անգամ ավելի քիչ է վաճառքի գնից:
Աճուրդն ընդհանուր տևել է տասը րոպե, ինչի արդյունքում այն ձեռք է բերել անհայտ գնորդ:
Իվանովի խոսքով՝ աշխատանքը ստեղծվել է 2009թ.՝ Գորբաչովի՝ Մոսկվայում Միջազգային համալսարան կատարած այցի ժամանակ: Իվանովը, որն այդ ժամանակ ուսանող էր, նախապես պատրաստել էր կտավ ու մարկեր, որպեսզի Գորբաչովը, ըստ իր ցանկության, ի հիշատակ ինչ-որ բան նկարի:
«Միխայիլ Սերգեևիչը ժպտաց, ստորագրեց ու հավելեց. «Ինքդ նկարիր, երևակայությունդ կբավականացնի»: Հենց նույն օրը ես կտավին գրեցի՝ «Ներողություն»»,-պատմել է Իվանովը: