Ալիևն ընդունել է ԵԱՀԿ ՄԽ համանախագահներին ու քննարկել ԼՂ հիմնահարցի շուրջ բանակցությունների ընթացիկ վիճակը
Ադրբեջանի նախագահ Իլհամ Ալիևը փետրվարի 21-ին Բաքվում ընդունել է ԵԱՀԿ Մինսկի խմբի համանախագահներ Իգոր Պոպովին (Ռուսաստան), Էնդրյու Շոֆերին (ԱՄՆ), Ստեֆան Վիսկոնտիին (Ֆրանսիա):
Ինչպես հայտնում է minval.az-ը, հանդիպմանը ներկա է եղել նաև ԵԱՀԿ գործող նախագահի անձնական ներկայացուցիչ Անջեյ Կասպրչիկը:
«Հանդիպման ընթացքում քննարկվել են Լեռնային Ղարաբաղի հակամարտության կարգավորմանն ուղղված բանակցությունների ընթացիկ վիճակն ու հեռանկարները»,-հայտնում է աղբյուրը:
Ավելի վաղ tert.am-ը տեղեկացրել էր, որ փետրվարի 20-ին ԵԱՀԿ ՄԽ համանախագահներին էր ընդունել ՀՀ վարչապետ Նիկոլ Փաշինյանը:
Նա ողջունել էր ԵԱՀԿ Մինսկի խմբի համանախագահների այցը Հայաստան և կարևորել նրանց դերակատարությունը՝ որպես Լեռնային Ղարաբաղի հակամարտության կարգավորման բանակցային միջազգային մանդատ ունեցող ձևաչափ:
ՀՀ վարչապետը ներկայացրել էր հունվարին Դավոսում տեղի ունեցած ոչ պաշտոնական հանդիպման մանրամասները:
Զրուցակիցները մտքեր էին փոխանակել ԼՂ հիմնահարցի կարգավորման գործընթացի համապատասխան մթնոլորտի ձևավորման շուրջ, ուրվագծել հետագա քայլերը: Կարևորվել էր հրադադարի ռեժիմի պահպանման ուղղությամբ ձեռք բերված պայմանավորվածություների իրականացումը: