Հայերը, հայկական բիզնեսն աշխարհում ամենուր են. Արմեն Սարգսյանը՝ ԱՄԷ պետնախարարին
Պաշտոնական այցով Արաբական Միացյալ Էմիրություններում գտնվող Հայաստանի Հանրապետության նախագահ Արմեն Սարգսյանն Աբու Դաբիում այսօր՝ հունվարի 15-ին, եւս մեկ հանդիպում է ունեցել Արաբական Միացյալ Էմիրությունների պետնախարար Սուլթան Ալ-Ջաբերի հետ՝ քննարկելու տնտեսության տարբեր ոլորտներում համագործակցության հեռանկարները։
Հանրապետության նախագահը նշել է, որ Հայաստանը թեեւ փոքր երկիր է, բայց հայերը գլոբալ եւ սերտորեն փոխկապակցված ազգ են: Եվ երբ ինքը՝ որպես նախագահ, խոսում է համագործակցության մասին՝ նկատի ունի ոչ միայն Հայաստանի Հանրապետությունը, որովհետեւ հայերը, հայկական բիզնեսն աշխարհում ամենուր են, ինչի շնորհիվ համագործակցության ներուժը անհամեմատ մեծանում է։
Զրուցակիցները պայմանավորվել են, որ որպես առաջին քայլ, ԱՄԷ-ից պատվիրակություն այցելի Հայաստան՝ հնարավորություններին տեղում ծանոթանալու, քննարկումներ ունենալու եւ եղած առաջարկները գործնական հիմքերի վրա դնելու համար։