Աջ ղեկով մեքենաները մաքսազերծելու նոր կարգ է սահմանվել
ՀՀ կառավարության քննարկմանը ներկայացվեց 2015 թվականի նոյեմբերի 19-ի թիվ 1359-Ն որոշման մեջ լրացում կատարելու որոշման նախագիծը: Այն մշակվել է՝ ելնելով ՀՀ պետական կառավարման շահագրգիռ մարմինների և «Ղեկը աջ» նախաձեռնության անդամների հետ կազմակերպված քննարկումների արդյունքներից:
Նախագծի ընդունմամբ՝ հնարավոր է ՀՀ մաքսային տարածքում տեղակայված, ինչպես նաև մինչև 2019 թվականի մարտի 1-ը ներմուծվող աջակողմյան ղեկային տեղաբաշխման տրանսպորտային միջոցները ՀՀ տարածք ներմուծել «Վերամշակում՝ ներքին սպառման համար» մաքսային ընթացակարգով:
Նշված մաքսային ընթացակարգը հնարավորություն կտա աջակողմյան ղեկային համակարգ ունեցող տրանսպորտային միջոցներն առանց վերասարքավորման ներմուծել ՀՀ տարածք, այստեղ մինչև 6 ամսվա ընթացքում իրականացնել ղեկի տեղափոխում, այնուհետ մաքսազերծելուց հետո հաշվառել ոստիկանությունում և դրանք շահագործել ՀՀ տարածքում:
Կառավարությունը հաստատեց ներկայացրած նախագիծը: