Սպասում են Նիկոլ Փաշինյանի եւ Արմեն Սարգսյանի արձագանքին
ՀՀ վարչապետի ժամանակավոր պաշտոնակատար Նիկոլ Փաշինյանին և ՀՀ Նախագահ Արմեն Սարգսյանին
Մեծարգո պարոնայք
2007թ. ՀՀ ԳԱԱ օպտիմալացման գործընթացի շրջանակներում երեք կազմակերպությունների միավորմամբ (Նուրբ օրգանական քիմիայի ինստիտուտ, Օրգանական քիմիայի ինստիտուտ և Մոլեկուլի կառույցի ուսումնասիրման կենտրոն) Նուրբ օրգանական քիմիայի ինստիտուտի (Երևան, Ազատության 26) տարածքում ստեղծվեց Օրգանական և դեղագործական քիմիայի գիտատեխնոլոգիական կենտրոնը: Միաժամանակ ազատվեց Քանաքեռում տեղակայված Օրգանական քիմիայի ինստիտուտի 5,8 հեկտար տարածքն ու շինությունները:
Նույն 2007թ-ից սկսվեցին ոտնձգությունները Ազատության 26-ում գտնվող ՀՀ ԳԱԱ ՕԴՔԳՏԿ ՊՈԱԿԻ տարածքի վրա: Առաջինն անօրինականորեն սեփականա-շնորհվեց Կենտրոնի տարածքում գտնվող ջրավազանը: Դրան հաջորդեցին ԵՊՀ շրջանավարտների միավորման կողմից «Երիտասարդ գիտնականներին և ստեղ-ծագործողներին մատչելի բնակարանով ապահովելու» ծրագրով մոտ 2 հեկտար հողատարածքի ու Երևանի քննչական կոմիտեին հատկացված կենտրոնի մեկ մասնաշենքի օտարումը: Այս ամենն իրականացվում էր Քանաքեռում առկա ազատ, 5,8 հեկտար տարածքի և երեք շինությունների առկայության դեպքում: Նախորդ իշխանություններին ուղղված մեր բողոքները մնում էին անպատասխան:
Ներկայումս, ներդրումային քաղաքականությամբ քողարկվելով, փորձ է արվում օտարել Կենտրոնի երկու մասնաշենք ու արտադրության համար նախատեսված տարածք: Ներկայիս իշխանությունը՝ ի դեմս ՀՀ Կառավարությանն առընթեր Պետական գույքի կառավարման վարչությանը, որն առանց հաշվի առնելու Կենտրոնի կոլեկտիվի կարծիքը, պատրաստել է Կառավարության որոշման նախագիծ, որի ընդունումը ՀՀ Կառավարության կողմից կվնասի Կենտրոնի գիտական կոլեկտիվի բնականոն և արդյունավետ աշխատանքին, ինչպես նաև կխափանի Կենտրոնի կողմից իրականացվող դեղերի արտադրության գործընթացը:
ՀՀ Կառավարության նոյեմբերի 8-ի նիստի օրակարգ ընդգրկված հ.26 կետով «Վարձակալությամբ անշարժ գույք տրամադրելու մասին» Կառավարության որոշման նախագծի բովանդակության և հիմքերի համադրմամբ աչքի է ընկնում «Որոշման նախագծի կետ 2-ի» և դրան հիմք հանդիսացող 20.07.2018թ թվագրված «Արատա» կազմակերպության ՀՀ փոխվարչապետ պարոն Տ. Ավինյանին ուղղված նամակը «Արատայի» գործունեությանն վերաբերյալ: «Որոշման նախագծին» կից «Ազադ ֆարմասյութիքլզի» կողմից ներկայացված փաստաթղթերում (երկուսն էլ թվագրված 13.08.2018թ., ուղղված են Պետգույքի կոմիտեի նախագահ պարոն Նարեկ Բաբայանին) բերված են կեղծ տվյալներ (իբր խնդրահարույց 1 և 2 մասնաշենքերում աշխատում է ՕԴՔԳՏԿ-ի 14 քիմիկոսներ, միչդեռ համաձայն կենտրոնի հաստիքացուցակի նրանց թիվը 30 է): Ասվածը հիմք է տալիս եզրակացնելու, որ ՀՀ Կառավարության անդամներին որոշում կայացնելու համար տրվում է ոչ ճիշտ տեղեկություն: Նման պատահական (թե դիտավորյալ) բացթողումները (ապատեղեկատվությունը) մեր կարծիքով ցույց է տալիս, այն կազմած գերատեսչության ու դրան կարծիք տված նախարարությունների կանխակալ վերաբերմունքը:
Կարևորելով ՀՀ Կառավարության ներդրումային քաղաքականությունը, համարում ենք, որ դրա իրականացումը չպիտի խաթարի ՀՀ արդեն գործող որևե կազմակերպության շահերը: Նշենք, որ ՀՀ ԳԱԱ ՕԴՔ ԳՏԿ-ն ունի 270 աշխատակից, որոնցից ՀՀ ԳԱԱ թղթակից անդամ -2, գիտությունների դոկտոր-24 և գիտությունների թեկնածու-76:
Նպատակ չունենալով դիմել, մեր ժամանակներում շատ տարածված, բողոքի եղանակին, այս նամակով դիմում ենք Ձեզ վերջ դնելու ՀՀ ԳԱԱ Օրգանական և դեղագործական քիմիայի գիտատեխնոլոգիական կենտրոնից նոր տարածքների օտարման գործընթացին, որով կնպաստեք մի կողմից գիտահետազոտական աշխատանքով զբաղված մեր կոլեկտիվի բնականոն գործունեությանն ու մյուս կողմից ինքնաֆինանսավորման սկզբունքով գործող դեղերի արտադրության գործունեությանը: Նշենք, որ Կենտրոնում արտադրվող դեղերը բավարարելով ՀՀ քաղաքացիների պահանջները արտահանվում են նաև Բելոռուս և Ուկրաինա: Այլ կերպ ասած կան պայմանագրեր որոնց դադարեցումը կհանգեցնի ֆինանսական վնասների: Նույն իրավիճակը կարող է ստեղծվել գիտահետազոտական որոշ պայմանագրերի հետ կապված ևս:
ՀՀ ԳԱԱ ՕԴՔ ԳՏԿ-ի գիտական խորհուրդ
1 Վիգեն Թոփուզյան, ՀՀ ԳԱԱ թղթակից անդամ, քիմ.գիտ.դոկտոր, պրոֆեսոր
2 Արա Գյուլնազարյան, քիմ.գիտ.դոկտոր
3 Արմեն Հովհաննիսյան, քիմ.գիտ.թեկնածու
4 Վիլեն Մնացականյան, քիմ.գիտ.դոկտոր, պրոֆեսոր
5 Գյուլնարա Գևորգյան, քիմ.գիտ.դոկտոր, պրոֆեսոր
6 Մելքոն Իրադյան, քիմ.գիտ.դոկտոր
7 Երվանդ Պարոնիկյան, քիմ.գիտ.դոկտոր, պրոֆեսոր
8 Աշոտ Մարկոսյան, քիմ.գիտ.դոկտոր
9 Ասյա Աղեկյան, քիմ.գիտ.թեկնածու
10 Ռաֆաել Մուրադյան, կենս.գիտ.թեկնածու
11 Հրաչիկ Գասպարյան, կենս.գիտ.թեկնածու
12 Սվետլանա Հովակիմյան, կենս.գիտ.թեկնածու
13 Ռուզաննա Պարոնիկյան, կենս.գիտ.թեկնածու
14 Հրաչյա Անանիկյան, քիմ.գիտ.թեկնածու
15 Գագիկ Հասրաթյան, քիմ.գիտ.դոկտոր, պրոֆեսոր
16 Մուշեղ Սարգսյան, քիմ.գիտ.դոկտոր
17 Գևորգ Դանագուլյան, ՀՀ ԳԱԱ թղթակից անդամ, քիմ.գիտ.դոկտոր, պրոֆեսոր
18 Մառլենա Հովակիմյան, քիմ.գիտ.դոկտոր
19 Տիգրան Կուրտիկյան, քիմ.գիտ.դոկտոր, պրոֆեսոր
20 Սուրեն Մամյան, քիմ.գիտ.թեկնածու
21 Ռաֆաել Թամազյան, ֆիզ.մաթ.գիտ.թեկնածու
22 Հենրիկ Փանոսյան, քիմ.գիտ.թեկնածու