Մոռացեք առաջընթացի մասին, քանի դեռ չեք նկատում ստրկատերերին
Գիտե՞ք, թե ինչու Հայաստանը չի զարգանում, առաջ չի շարժվում, կենսամակարդակը չի աճում, մարդկանց կյանքի պայմանները չեն բարելավվում: Եթե չգիտեք, ապա իմացեք. պատճառն այն է, որ Հայաստանում պաշտոնյաների հայտարարությունները, քայլերը գրեթե միշտ մնում են անհետեւանք եւ անարձագանք:
Այսպես, օրերս ՊԵԿ նախագահ Դավիթ Անանյանը հետեւյալ սկանդալային, մեղմ ասած սկանդալային, հայտարարությունն արեց. «Մենք նախ ինքներս ենք մաքրվելու: Արմատական փոփոխություններ ենք կատարելու: Մեր այն ընկերները, ովքեր 20 տարուց ավելի աշխատել են եւ արդեն նոր աշխատանք ստեղծելու եւ իրենց փորձը փոխանցելու կարողություն չունեն, իրենց պետք է առոք-փառոք ուղարկենք տուն: Իսկ մարդիկ, ովքեր 10 տարվա աշխատանքային փորձ ունեն եւ այդ փորձը փոխանցելու ունակություն, ապա նրանց կպահենք»:
Սա ստրկատիրոջ սովորական մտածելակերպ եւ հայտարարություն է: Այս հայտարարությունը մի ժամանակ ստրկատեր ֆերմերների կողմից հնչել է այսպես. «Մեր այն ստրուկները, ովքեր աշխատել են քսան տարուց ավելի եւ այլեւս նոր գործ չեն կարողանում անել եւ չեն փոխանցում իրենց փորձը, իրենց պետք է վաճառենք: Իսկ ովքեր տասը տարի են ստրուկ մեզ մոտ եւ կարող են իրենց փորձը փոխանցել նոր ստրուկներին, դեռ կպահենք եւ նոր կվաճառենք կամ...»:
Եւ այս հայտարարությունից հետո Դավիթ Անանյանը պաշտոնանկ չարվեց, ավելին, նրա հայտարարությունը մնաց աննկատ: Որեւէ մեկը չզրուցեց արդեն նյարդային վիճակում գտնվող ՊԵԿ այն աշխատակիցների հետ, որոնք ընդամենը 45-50 տարեկան են, եւ որոնց ակնարկեցին, որ շուտով անգործ են մնալու, որեւէ մեկը չզրուցեց այն աշխատակիցների հետ, որոնց հասկացրին, որ ձեզ պահելու են միայն նրա համար, որ նորերին փորձ փոխանցեք:
Եւ ամենակարեւորը, որեւէ մեկը Դավիթ Անանյանին չասաց, որ ինքը իրավունք չունի մարդուն գործից դուրս շպրտել միայն նրա համար, որ նա քսան տարուց ավելի է աշխատել: Գիտնականները վաղուց ապացուցել են, որ մարդը իր ստեղծագործական, աշխատանքային գագաթնակետին հասնում է 45-55 տարեկանում: Հիմա մենք վերցնում եւ բավական երիտասարդ մարդկանց դուրս ենք շպրտում:
Իրականում, գործից պետք է դուրս մնան նրանք, ովքեր չեն կարողանում աշխատել, ովքեր կաշառակեր են, ովքեր իրենց աշխատանքի իմաստը տեսնում են շեֆին քծնելու մեջ, ընդ որում, անկախ տարիքից եւ սեռից:
Իսկ մենք շարունակելու ենք հետ գլորվել, քանի դեռ նման հայտարարությունները մնում են անպատիժ եւ անհետեւանք, քանի դեռ նախարարը, պետական ծառայության ղեկավարը, մարզպետն ու քաղաքապետն իրենց ֆեոդալ կամ ստրկատեր են զգալու:
Լուսանկարում գետնին ընկած տղամարդն արդեն քսան տարուց ավելի ստրուկ էր աշխատում եւ չէր կարողանում փոխանցել իր փորձը:
Հակոբ Ասատրյան
Top-News.am