Վլադիմիր Պուտինը Խաբիբ Նուրմագոմեդովի հորը խնդրել է խիստ չպատժել որդուն (տեսանյութ)
Ռուսաստանի Դաշնության նախագահ Վլադիմիր Պուտինը հանդիպել է թեթև քաշային կարգում UFC-ի չեմպիոն Խաբիբ Նուրմագոմեդովի և նրա հոր` Աբդուլմանապ Նուրմագոմեդովի հետ:
ՌԴ նախագահը շնորհավորել է դաղստանցի մարզիկին Կոնոր Մաքգրեգորի նկատմամբ Լաս-Վեգասում տարած հաղթանակի առթիվ, ինչպես նաև խնդրել նրա հորը խիստ չպատժել Խաբիբին` մենամարտի ավարտից հետո ծեծկռտուք սարքելու համար:
Ավելի վաղ, Աբդուլմանապը հայտարարել էր, որ UFC-ից էլ դաժան կպատժի Խաբիբին:
«Կխնդրեմ հորդ, որ քեզ խիստ չպատժի»,- կատակել է Պուտինը և հավելել, որ տիտղոսի համար պայքարում Խաբիբը վստահ հաղթանակ է տարել.
«Ամեն դեպքում, գլխավոր խնդիրը կատարել ես` արժանի և շատ վստահ հաղթանակ ես տարել»,- ասել է Պուտինը:
Հիշեցնենք, որ UFC 229 մրցաշարի շրջանակում կայացած Խաբիբ Նուրմագոմեդով-Կոնոր Մաքգրեգոր մենամարտում հաղթելուց հետո Խաբիբն ու իր թիմակիցները ծեծկռտուք էին սարքել:
Միջադեպից հետո լուրեր էին շրջանառվում, որ UFC-ն կարող է պատժել Նուրմագոմեդովին և նրան չտալ չեմպիոնական գոտին: