Կիրգիզ երգչուհուն սպառնում են ներքնազգեստով տեսահոլովակի համար
Կիրգիզիայից երիտասարդ երգչուհի Զերե Ասիլբեկը վախենում է իր կյանքի համար, քանի որ նրա հասցեին սկսել են սպառնալիքներ տեղալ՝ տեսահոլովակի պատճառով, որտեղ նա նկարահանվել է պիջակով, կրծկալով և կիսաշրջազգեստով։ Ընդ որում, երկրի բնակիչները վրդովվել են ոչ միայն երգչուհու արտաքին տեսքից, այլև քննադատել են երգի տեքստը, որտեղ նա կոչ է անում հիշել կանանց իրավունքների մասին և խնդրում է կանանց չսովորեցնեն՝ ինչպես ապրել։
Տեսահոլովակի թողարկումից հետո աղջիկը սկսել է հաղորդագրություններ ստանալ, որ եթե նա չհեռացնի տեսահոլովակը և ներողություն չխնդրի ժողովրդից, ապա նրան կսպանեն։ Մասնավորապես, նրան հաղորդել են, որ «հաճույքով կկտրեն գլուխը»։
Երգչուհին արդեն դիմել է ոստիկանություն։ Ի պաշտպանություն երգչուհու համացանցում ֆլեշմոբ է սկսվել, որտեղ աղջիկները դնում են ներքնազգեստով իրենց նկարները, սակայն իրենց երեսը ցույց չեն տվել։