Սկրիպալների թունավորման համար կասկածվող ռուսներն անհետացել են Մարգարիտա Սիմոնյանին տված հարցազրույցից հետո
Այս թեմայով
- Սկրիպալներին «թունավորողին» նկատել են ՌԴ գլխավոր հետախուզական վարչության գեներալի դստեր հարսանիքին (լուսանկար)
- Սերգեյ Սկրիպալը թունավորման դեպքից հետո առաջին անգամ զանգահարել է հարազատներին
- Սկրիպալների գործով ԱՄՆ-ն նոր պատժամիջոցներ է պատրաստում Ռուսաստանի դեմ
- Վիկտորյա Սկրիպալը պատմել է «տառապանքների տարվա» մասին
Ռուսաստանի քաղաքացիներ Ալեքսանդր Պետրովը և Ռուսլան Բոշիրովը, որոնք, ինչպես պնդում են Մեծ Բրիտանիայի իշխանությունները, ներգրավված են Սոլսբերի քաղաքում ռուսական հետախուզական ծառայության նախկին աշխատակից Սերգեյ Սկրիպալի և նրա դստեր թունավորման գործում, անջատել են հեռախոսը RT-ի գլխավոր խմբագիր Մարգարիտա Սիմոնյանին տված հարցազրույցից հետո: Այդ մասին Սիմոնյանը պատմել է BBC Newsnight-ին տված հարցազրույցում:
Սիմոնյանի խոսքով՝ Պետրովն ու Բոշիրովը խոստացել են WhatsApp-ով ուղարկել իրենց լուսանկարները Սոլսբերիի տաճարի ֆոնին, սակայն դա դեռ չեն արել:
«Ես փորձել եմ զանգահարել նրանց այն հեռախոսահամարով, որով նրանք զանգահարել էին ինձ, սակայն այն անհասանելի էր: Նրանք ասել են, որ լուսանկարները գտնելու դեպքում կուղարկեն ինձ, սակայն ես դեռ սպասում եմ», - ասել է Սիմոնյանը:
Նրա խոսքով՝ հարցազրույցից առաջ Պետրովն ու Բոշիրովն ասել են իրեն, որ սա իրենց առաջին ու վերջին հարցազրույցն է լրագրողներին: Տղամարդիկ համաձայնել են հարցազրույց տալ այն պայմանով, որ ոչ մի հարց չի լինի, որը թույլ կտա լրագրողներին գտնել իրենց բարեկամներին, գործընկերներին, ծանոթներին կամ համադասարանցիներին:
Հիշեցնենք, որ Ալեքսանդր Պետրովը և Ռուսլան Բոշիրովը բացառիկ հարցազրույց են տվել RT-ի գլխավոր խմբագիր Մարգարիտա Սիմոնյանին: Նրանք հայտարարել են, որ իսկապես այցելել են անգլիական այդ քաղաք այս տարվա մարտին: Նրանց խոսքերով՝ նրանք քաղաք են ժամանել մարտի 3-ին և պարզապես զբոսնել են մոտ մեկ ժամ: Մեծ Բրիտանիա իրենց այցի հիմնական նպատակ են նշել Լոնդոնում ժամանակ անցկացնելու ցանկությունը:
Այնուհետև Մեծ Բրիտանիայի արտաքին գործերի նախարարությունը մեկնաբանել է Սկրիպալների թունավորման համար կասկածվող ռուսների հարցազրույցը՝ «Ռուսաստանի կողմից հարցի շփոթեցման ու ստի» հերթական օրինակ անվանելով այն:
Մեծ Բրիտանիայի ոստիկանությունը սեպտեմբերի 5-ին հանդես էր եկել հայտարարությամբ՝ գաղտնազերծելով ռուսական հետախուզական ծառայության նախկին աշխատակից Սերգեյ Սկրիպալի ու նրա դստեր՝ Յուլյայի թունավորման սկանդալային գործով երկու կասկածյալների անունները: Խոսքն Ալեքսանդր Պետրովի ու Ռուսլան Բոշիրովի մասին է, որոնք Սկրիպալների դեմ հարձակումից մի քանի օր առաջ «Աէրոֆլոտ»-ի չվերթներից մեկով Մեծ Բրիտանիա էին մեկնել:
Հիշեցնենք, որ 66-ամյա նախկին լրտես Սերգեյ Սկրիպալը և նրա դուստրը մարտի 4-ին նյարդապարալիտիկ գազի ազդեցության էին ենթարկվել անգլիական Սոլսբերի քաղաքում և անգիտակից վիճակում տեղափոխվել հիվանդանոց։
Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում: