Երևանի ավագանու արտահերթ ընտրությունների օրն արդեն հայտնի է
Երևանի ավագանու արտահերթ ընտրությունները տեղի կունենան սեպտեմբերի 23-ին:
Այս մասին այսօր որոշվեց Կենտրոնական ընտրական հանձնաժողովում նիստի ժամանակ, որի օրակարգում էին Երևանի ավագանու արտահերթ ընտրությունների օրվա հրապարակման հարցն ու ընտրությունների նախապատրաստման ու անցկացման հիմնական միջոցառումների ժամանակացույցի հաստատումը:
Լրագրողների հետ զրույցում ԿԸՀ քարտուղար Արմեն Սմբատյանն ասաց, որ Երևանի ավագանու ընտրություններին մասնակցելու համար հայտերի ընդունման վերջնաժամկետը սեպտեմբերի 3-ն է, ինչ վերաբերում է քարոզարշավին, ապա Սմբատյանն ասաց, որ արտահերթ ընտրությունների ժամանակ քարոզարշավի ժամկետը կրճատվում է. «Քարոզարշավը կմեկնարկի սեպտեմբերի 10-ին և կավարտվի սեպտեմբերի 21-ին»:
Հարցին, թե կուսակցությունները կհասցնեն տեղավորվել սահմանված ժամկետում, Սմբատյանն ասաց, որ կուսակցությունների համար պարզ էր, որ տեղի են ունենալու արտահերթ ընտրություններ, հետևաբար կուսակցություններն իրենց նախապատրաստական աշխատանքները սկսել են ավելի շուտ:
«Մինչև օգոստոսի 29-ը կարող են ԿԸՀ ներկայացնել մասնակցության փաստաթղթերը, իսկ գրանցման վերջնաժամկետը սեպտեմբերի 3-ն է»,-ասաց նա:
Հարցին, թե ինչով է տարբերվում այս ընտրությունները, Սմբատյանն ասաց, որ նոր քաղաքական պլատֆորմ է, և առավել հետաքրքիր ընտրություններ են սպասվում: