Հայ, վրացի, ադրբեջանցի երիտասարդները՝ հանուն խաղաղության
Վրաստանի, Հայաստանի, Ադրբեջանի երիտասարդությունը Թբիլիսիում հիմնադիր համաժողով է անցկացրել՝ հանուն խաղաղության։ «Նոր սերունդը՝ հանուն խաղաղության» շարժման հիմնական նպատակը երիտասարդների ուղերձն է իրենց ավագ սերնդին՝ առ այն, որ Հայաստանի և Ադրբեջանի միջև առկա հակամարտությունն ունի միայն խաղաղ հանգուցալուծում։
ՄԱԿ-ում Վրաստանի երիտասարդության ներկայացուցիչ Գեորգի Թումասյանը նշում է՝ համաժողովի մասնակիցները 18-30 տարեկան երիտասարդներ են, ովքեր մանիֆեսթ են ստորագրել՝ կոչ անելով բացառել զենքի գործադրումը և հակամարտության կարգավորման ուժային տարբերակը.«Կովկասում խաղաղություն հաստատելու միակ տարբերակը տարածաշրջանի երիտասարդության համախմբումն է՝ անկախ ազգային, էթնիկ պատկանելությունից։ Երիտասարդությունը վստահ է, որ կարող է և պետք է իր ներդրումն ունենա տարածաշրջանում խաղաղության հաստատմանը»։