Սերժ Թանկյանը կոչ է արել չօգտագործել Հայոց ցեղասպանությունը որպես կապիտալ՝ արտաքին քաղաքականություն վարելու համար
Ամերիկյան System of a Down ռոք խմբի հանրահայտ երաժիշտ Սերժ Թանկյանը կոչ է արել չօգտագործել Հայոց ցեղասպանությունը որպես կապիտալ՝ արտաքին քաղաքականություն վարելու համար: Այդ մասին նա գրել է Facebook-ի իր էջում՝ կիսվելով eurasianet.org կայքում հրապարակված հոդվածով, որի հեղինակը գրում է, որ Իսրայելի և Թուրքիայի միջև դիվանագիտական վեճի ֆոնին Հայոց ցեղասպանությունը ճանաչելու իսրայելցի քաղաքական գործիչների կոչը քննադատություն է առաջացրել այն առնչությամբ, որ այդպես ցեղասպանության հարցը վերածվում է քաղաքական ֆուտբոլի:
«Պատմությունը սուբյեկտիվ չէ: Խնդրում ենք, մի՛ օգտագործեք մեր հայ, հույն և ասորի նախնիների ցեղասպանությունը որպես քաղաքական կապիտալ կամ թնդանոթի միս՝ ձեր արտաքին քաղաքականության համար...Ճանաչեք ցեղասպանությունը, որովհետև դա է ճշմարտությունը»,- գրել է Թանկյանն իր էջում:
Մայիսի 16-ին Քնեսեթի երկու անդամ օրենքի նախագիծ է ներկայացրել խորհրդարան, որով նախատեսվում է ճանաչել Հայոց ցեղասպանությունը:
Հիշեցնենք, որ Թուրքիայի նախագահ Ռեջեփ Թայիփ Էրդողանը, մեկնաբանելով Գազայի հատվածում տեղի ունեցածը, Իսրայելին ահաբեկչական պետություն էր անվանել, բացի այդ՝ նա հետ է կանչել Թել Ավիվում ու Վաշինգտոնում իր դեսպաններին՝ ստեղծված իրավիճակի շուրջ խորհրդակցության համար։
Իսրայելի վարչապետ Բինյամին Նեթանյահուն, իր հերթին, պատասխանելով Էրդողանին, նշել էր, որ նա վերջին մարդն է, ով կարող է իրենց բարոյականության դասեր տալ։
Ինչպես գրում է հոդվածագիրը, անցյալում Թուրքիայի հետ սերտ դիվանագիտական և ռազմական կապերը թույլ չեն տվել Իսրայելին ճանաչել Հայոց ցեղասպանությունը: Պարզ չէ, թե արդյոք բավականաչափ բան է փոխվել երկրների միջև հարաբերություններում՝ նախկին հաշվարկները փոխելու համար: Անկախ ամենից՝ հարցի վերաբերյալ Իսրայելի հետուառաջ անելը քննադատության է արժանացել ինչպես իսրայելցիների, այնպես էլ հայերի կողմից:
«Ես չեմ կարծում, որ սա դա անելու ճիշտ ձևն է: Եթե մենք ցանկանում ենք նման որոշում կայացնել, դա պետք է միայն հարցի հետ կապված լինի: Դա ի պատիժ թուրքերի անելը բավականաչափ անհարգալից է»,- ասել է զբոսաշրջության նախարար Յարիվ Լևինը:
«Դա որպես քաղաքական գործիք օգտագործելը հարվածում է դրա պատմական կարևորությանը, և պարզապես տգեղ քայլ է»,- Twitter-ում գրել է Իսրայելի և Թուրքիայի հարցերով զբաղվող Brooklyn College-ի պատմաբան Լուիս Ֆիշմանը օրենքի նախագծի ներկայացվելուց հետո:
Չնայած Իսրայելը միակ երկիրը չէ, որ քաղաքականացնում է Հայոց ցեղասպանության ճանաչման հարցը, բայց Իսրայելը նման քննադատության ալիքի է արժանացել հայերի կողմից՝ իր առանձնակի ցինիկ կերպով հարցն օգտագործելու պատճառով, գրում է հեղինակը: