Բժիշկները փրկել են 275 գրամանոց նորածնին
Գետտինհենյան կլինիկայի աշխատակիցներին հաջողվել է փրկել 275 գրամ կշռող փոքրիկի կյանքը: Մինչ այսօր փոքրիկը հանդիսանում է աշխարհում արական սեռի ամենափոքրիկ ներկայացուցիչը, ում կյանքը հաջողվել է փրկել:
Կլինիկայի աշխատակցի` Ստեֆան Վելլերի խոսքերով, փոքրիկի մայրը բուժհաստատություն էր եկել հղիության 25-րդ շաբաթում: Բարդություններից զերծ մնալու համար բժիշկները որոշել են կեսարյան հատում կատարել: Ծնված երեխան կշռում էր ընդհամենը 275 գրամ և ուներ 27 սանտիմետր հասակ:
Փոքրիկը 6 ամիս մնացել է ինտենսիվ թերապիայի բաժնում: Այդ 6 ամիսների ընթացքում փոքրիկի քաշը դարձել է 3.7 կիլոգրամ: Փոքրիկն արդեն տանն է, սակայն բժիշկները շարունակում են հետևել նրա առողջական վիճակին:
Գերմանիայում համարվում է, որ երեխայի կյանքը հնարավոր է փրկել, եթե նա կշռում է առնվազն 350 գրամ: Հայտնի է ևս մի քանի դեպք, երբ ավելի քիչ կշիռ ունեցող փոքրիկների կյանքը հաջողվել է փրկել:
Օրինակ, մի քանի տարի առաջ ամերիկացի բժիշկներին հաջողվեց փրկել մի փոքրիկ աղջկա, ով կշռում էր 243 գրամ, իսկ ճապոնացի բժիշկները փրկել են մի փոքրիկի, ով կշռում էր ընդամենը 297 գրամ: