Սաքուլիկներ, որոնք կյանքեր են խլում
Հունվարի 8-ին, 04:13-ին Երեւանի Աբովյան փողոցի եւ Սայաթ-Նովայի պողոտայի խաչմերուկում տեղի է ունեցել ՃՏՊ: Միանգամից շեշտենք, որ սա սովորական կամ շարքային ՃՏՊ չէ, ոչ միայն այն պատճառով, որ կա զոհ, այլ նաեւ այն պատճառով, որ սարսափելի վթարի մեղավորը BMW X 6-ի վարորդն է՝ «Ճվճըվ Արոյի» որդի «Սաքուլիկը»՝ Սարգիս Վարդանյանը:
Toyota-ին բախվելուց հետո Սաքուլիկի ավտոմեքենան բախվել է ճանապարհի մայթեզրին տեղադրված գովազդային վահանակին եւ հայտնվել մայթին, որից հետո նա դիմել փախուստի:
Հիմա ուշադրություն դարձնենք այն տեղեկությանը, ըստ որի BMW X 6-ի մեջ հայտնաբերվել են մի քանի համարանիշներ՝ հայկական եւ ռուսական, իսկ այդ պահին մեքենայի վրա եղել են տրանզիտ համարանիշներ:
Սա ի՞նչ է նշանակում: Ո՞վ է Սաքուլիկը, որի մոտ այդքան համարանիշներ կան, այդ թվում եւ օտար պետության: Ինչո՞վ են զբաղված մեր իրավապահ մարմինները: Ինչո՞ւ նրանք հարկ եղած զգոնությունը չեն ցուցաբերել մի անձի նկատմամբ, որը Հայաստանում, հավանաբար, ամենից հաճախ է հայտնվում քրեական խրոնիկայում:
Հատուկ ընդգծենք, որ Սաքուլիկի գործողությունների արդյունքում զոհվածը եւ վիրավորը ծառայության մեջ են եղել: Նրանք ՃՈ 1-ին սպայական գումարտակից էին:
Վստահաբար կարող ենք պնդել, որ այս ողբերգությունը հաստատ չէր լինի, եթե Սաքուլիկ կոչվածը վաղուց արդեն զրկված լիներ ազատությունից: Հիմա նա, իբր ինքնակամ, ներկայացել է ոստիկանություն: Եւ կրկին Երեւանում համառ լուրեր են շրջանառվում, որ նրան վաղ թե ուշ բաց են թողնելու, ինչպես միշտ է լինում:
Այս նույն Սաքուլիկը 2017-ի մարտի վերջերին բերման էր ենթարկվել եւ կրկին ազատ արջակվել: Այն ժամանակ ավտոտեսուչներից ճողոպրելիս նա վնասել էր մի քանի ավտոմեքենա:
Դեռ այն ժամանակ Գագիկ Շամշյանը հենվելով ոստիկանների տեղեկությունների վրա պնդում էր, որ «Ճվճվ Արոյի» որդի Սաքուլիկի մասնակցությամբ ճտպ-ների հետեւանքով տուժածների թիվը հասնում է 27-ի:
«Դեպքի վայրում հավաքված քաղաքացիները, իմանալով, որ վնասազերծվածը Ճվճվ Արոյի անուղղելի զավակն է, ասում էին. «Ոստիկանությունը բռնում ա, քննչական էլ քննում, գործն ուղարկում ա դատարան, դատարանն էլ մի հատ մուրճի հարվածով այդ լածիրակին ազատ ա արձակում, ով, փոխարենը՝ ուղղվի, ավելի ա կատաղում ու ընկնում խեղճ ժողովրդի ջանին: Դրա նմաններին պետք է երկար ժամանակ կտրեն հասարակությունից, որ իմանա՝ ինչ է օրենքը: Հույսը դրել է իրեն գազի մագնատ համարող պապու վրա, բաց կգա էն ժամանակը, որ սրա նման անդաստիարակը կիմանա, որ պապն ամեն անգամ փլավ չի ուտում»,- գրել էր Շամշյանը դեռ մարտին:
Հասարակ, համեստ, օրինապաշտ քաղաքացիները տուգանվում են ամենաննշան խախտումների համար: Տուգանվում են հաճախ այնպիսի դեպքերում, երբ կարելի է չտուգանել: Տուգանում են, մտավորականներին, բանվորներին, բժիշկներին, ուսուցիչներին, դասախոսներին, իսկ ահա սաքուլիկները կարող են ամենազազրելի խախտումները թույլ տալ, դառնալ ողբերգության պատճառ, բայց մնալ ազատության մեջ:
Կարծում ենք ժամանակն է, որ ոստիկանապետ Վլադիմիր Գասպարյանի, իրավապահ համակարգի մյուս ներկայացուցիչների մեջ խոսի թասիբը, պատվախնդրությունը: Սաքուլիկի նմանը այլեւս չպետք է ազատության մեջ լինի:
Հասարակությունը ոստիկաններից սպասում է հստակ եւ վճռական գործողությունների, որից հետո մեր երկիրը կազատվի սաքուլիկներից, որոնք արդեն իրենց անպատիժ են զգում:
Պետք է գիտակցենք, որ եթե հանկարծ Սաքուլիկը այս ողբերգությունից հետո հայտնվի ազատության մեջ, ապա իրավիճակը երկրում կդառնա էլ ավելի քաոսային: Առանց այն էլ վերջին շրջանում հաճախ ենք ականատես լինում, թե ինչպես են ռուսական համարանիշներով ավտոմեքենաների վարորդները, մեղմ ասած, ցինիկ պահվածք դրսեւորում: Նրանք անցնում են կարմիր լույսի տակով, դուրս են գալիս հանդիպակած երթեւեկելի գոտի, մտնում զբոսայգիներ, վազանց կատարում ամենավտանգավոր տեղերում:
Եթե Սաքուլիկը վաղը կամ մյուս օրը հայտնվի ազատության մեջ, ապա դա նշան կլինի մյուս սաքուլիկներին, որ այլեւս իրենց ամեն ինչ կարելի է՝ ամեն ինչ:
Հիմա հասարակությունը սպասում է, թե ինչ է լինելու: Շատերը թերահավատ են: Վստահ են, որ այս երիտասարդը, որին «գլխակեր են» համարում կրկին հայտնվելու է ազատության մեջ: Եւ հիմա ճիշտ ժամանակն է հասկանալու համար, թե մենք պետություն ունենք, թե այն պարտվել է սաքուլիկներին եւ նրանք այսուհետ գործելու են լիակատար անպատժելիության մեջ:
Մենք, սակայն դեռ հուսով ենք, որ իրավապահ համակարգում վերջապես կհաղթի պատվախնդրությունն ու թասիբը եւ սաքուլիկներն արմատախիլ կլինեն մեր երկրից: Հարցը շատ պարզ է՝ կամ պետությունը կանգնում է իր բարձրության վրա կամ սաքուլիկները խժռելու են այս երկիրը:
Գեղամ Նազարյան
Top-News.am