Ինչո՞ւ միայն Վիգեն Սարգսյանին տեսաք, իսկ Արթուր Աբրահամը

Հայ Առաքելական եկեղեցին չի կարող անթերի լինել, չի կարող վատ հոգեւորականներ չունենալ: Նույնը վերաբերում է մյուս բոլոր եկեղեցիներին: Վատ հոգեւորականներ եւ թերություններ ունեն կաթոլիկ եկեղեցին, բողոքական հարյուրավոր եկեղեցիները, շիաները, սունիները, հինդուսները, բուդայականները:

Այս ամենի հետ միասին մեր կողքին ապրում են մարդիկ, որոնք առիթ են փնտրում հերթական անգամ հավատի կամ եկեղեցու դեմ հերթական գրոհն իրականացնելու համար:

Նրանք մեկ պահանջում են, որ զինվորներին եկեղեցի չտանեն եւ բանակում չաղոթեն: Հետո հիշում են, որ դպրոցում կրոնի պատմություն են դասավանդում, եւ պահանջում են վերացնել այդ դասաժամը, հետո սկսում են ծաղրել քահանաների այս կամ այն հայտարարությունը:

Ընդ որում, նրանք հիմնականում հայտարարում են, որ աթեիստ են կամ էլ պնդում են, որ Հայ առաքելական եկեղեցու անդամ չեն: Հայտարարում են եւ հետո կուրծք ծեծելով ասում, թե բա այս կամ այն քայլը վնասում է եկեղեցուն: 

Հիմա էլ ահավոր ծանր են տանում, որ պաշտպանության նախարար Վիգեն Սարգսյանը խաչքավոր է եղել: Ծանր են տանում, քննադատում: Նրանք չգիտեն ինչ է խաչքավորը, անգամ ասում են, թե նա հոգեւորականի շոր է հագել: Ոմանք էլ ասում են, թե պաշտոնյաներն իրենց ընկած վարկանիշը փորձում են եկեղեցու միջոցով բարձրացնել: Ասում են նրանք, ովքեր մշտապես քննադատել են եկեղեցուն եւ իրենց եկեղեցու անդամ չեն համարում:

Գործը հասել է այնտեղ, որ իրենց իրավունք են վերապահում քննարկել, թե Վիգեն Սարգսյանն իրավունք ունի խաչքավոր լինել, թե ոչ, եւ պնդում են, թե չունի, քանի որ վատ պաշտոնյա է:

Իսկ Վիգեն Սարգսյանն այն եզակի նախարարներից է, որ պաշտոնավարման սկզբից որոշակի խնդիրներ է դրել եւ սկսել է իրականացնել դրանք, նախաձեռնելով մի շարք ծրագրերի սկիզբ, որոնց հաջող իրականացման դեպքում կշահի ոչ միայն բանակը, այլ նաեւ կրթությունը:

Եւ չգիտես ինչու նրանք չեն նկատել հայաստանյան բազմաթիվ եկեղեցիների մյուս խաչքավորներին: Լավ, որ այդքան սկզբունքային եք, ինչո՞ւ եք կենտրոնացել Վիգեն Սարգսյանի վրա, ինչու նկատեցինք միայն նրան: Ինչու չեք քննադատում Արթուր Աբրահամին: Ինչու չեք ասում, թե ինչպես կարող է խորան բարձրանալ մի մարդ, որը հարուստ է եւ շատ մարդկանց ցավ է պատճառել, անգամ շատ ծանր վնասվածքներ:

Պարզ է, կասեք Վիգեն Սարգսյանը պաշտոն է զբաղեցնում՝ դրա համար: Այսքանով կտաք, ձեր կարծիքով, սպառիչ պատասխան: Կտաք, բայց կմատնեք ձեզ, հուշելով, թե ինչ նպատակ եք հետապնդում: 

Բայց անկեղծ լինենք, ձեր արածը միայն ծիծաղ է առաջացնում: Մեկ ասում եք, թե դուք եկեղեցու հետ կապ չունեք, մեկ խորանում եք եկեղեցու գործերում եւ անգամ նեղվում, որ պաշտոնյաները եկեղեցին օգտագործում են իրենց ընկած հեղինակությունը բարձրացնելու համար: Հարց է առաջանում, եթե պնդում եք, որ եկեղեցին հեղինակազրկված է, ապա ինչպես կարող են պաշտոնյաները եկեղեցու միջոցով բարձրացնել իրենց ընկած հեղինակությունը:

Ահա այսպիսի ժամանակներ են, երբ մեր կողքին ապրում են մարդիկ, որոնց թվում է, թե իրենց մասին ոչինչ չգիտենք եւ կարծում ենք, որ իրենցից հրեշտակի թեւեր են կպած եւ այնքան են ոգեւորվում, որ սկսում են դատել, քննադատել եւ բարձրից խորհուրդներ տալ:

Նորից կրկնենք՝ մեր եկեղեցին բազում խնդիրներ ունի, պաշտոնյաները բազմաթիվ սխալներ, բայց դա չի նշանակում, որ եկեղեցուց եւ հավատից դուրս մարդիկ իրենց պետք է իրավունք վերապահեն հատկապես եկեղեցական տոների օրերին ծաղրեն եւ հեգնեն եկեղեցուն կամ խաչքավոր դարձած պաշտոնյաներին:

Top-News.am