Հայտնաբերվել են խիստ ճարպակալման գենետիկ պատճառները
Ճարպակալման խիստ ձևը պայմանավորված է գենետիկ տեղեկատվության պակասով: Այսպիսի եզրահանգման են եկել Լոնդոնի Կայսերական քոլեջի բրիտանացի գիտնականների մի խումբ` Ֆիլիպպ Ֆրոգելի ղեկավարությամբ:
Գիտնականները հետազոտել են մտավոր թերզագած մի խումբ հիվանդների, ովքեր ճարպակալման հանդեպ մեծ նախատրամադրվածություն ունեին և մտնում էին ռիսկային խմբի մեջ: Այս խմբի 31 տոկոսի մոտ, որոնց քաշի ինդեքսը գերազանցում էր 30-ը (այս ինդեքսը վկայում է այն մասին, որ առկա է քաշի զգալի ավելցուկ), բացակայում էին 16-րդ քրոմոսոմի որոշ մասնիկներ:
Այս հետազոտությունից հետո գիտնականներն ուսումնասիրեցին 16 հազար հիվանդի և պարզ դարձավ, որ խիստ ճարպակալում ունեցող մի քանի տասնյակ հիվաննդների մոտ առկա են նմանօրինակ գենետիկ շեղումներ: Նորմալ քաշ ունեցող մարդկանից և ոչ մեկի մոտ 16-րդ քրոմոսոմի մուտացիաներ չեն հայտնաբերվել:
Լոնդոնի Կայսերական քոլեջի աշխատակիցներից մեկի` Ռոբին Վոլտերսի խոսքերով 16-րդ քրոմոսոմի նմանատիպ մուտացիաներ հադիպում են հազարը յոթի հարաբերությամբ, այն մարդկանց մոտ, ովքեր ճարպակալման խնդիր ունեն: Վոլտերսն ընդգծեց, որ ժառանգական տեղեկատվության այս մասնակի կորուստը բացատրում է, թե ինչու են նույն ընտանիքի մի քանի սերունդներ ճարպակալման հետ կապված խնդիրներ ունենում:
Ֆրոգելը հավելեց, որ գենետիկ թեսթավորումը թույլ կտա նախապես պարզել, թե ով նմանատիպ խնդիր ունի և նշանակել համապատասխան բուժում` այսպիսով կանխարգելելով ճարպակալումը:
Մեծ Բրիտանիայի Առողջապահության ազգային ծառայության տվյալներով երկրի յուրաքանչյուր երրորդ բնակիչ դպրոցն ավարտելու պահին ավելորդ քաշի խնդիր ունի: Եթե այսպես շարունակվի, 2050 թվականին ճարպակալմամբ տառապող մարդկանց ցուցանիշը կավելանա 60 տոկոսով: