Հայաստանի եւ Ադրբեջանի ԱԳ նախարարների հանդիպումը կարող է կայանալ սեպտեմբերի 23-ին
Հայաստանի եւ Ադրբեջանի արտաքին գործերի նախարարներ Էդվարդ Նալբանդյանի եւ Էլմար Մամեդյարովի հանդիպումը կարող է կայանալ սեպտեմբերի 23-ին ՄԱԿ Գլխավոր վեհաժողովի շրջանակում, դիվանագիտական աղբյուրներին հղումով գրում է Ինտերֆաքսը:
«ՀՀ եւ Ադրբեջանի ԱԳ նախարարների հանդիպումը ՄԱԿ ԳՎ շրջանակում կարող է կայանալ սեպտեմբերի 23-ին»,- ասել է գործակալության աղբյուրը:
Ավելի վաղ Ինտերֆաքսը հրապարակել էր Հայաստան-Սփյուռք 6-րդ համահայկական ֆորում ժամանակ Նալբանդյանի հայտարարությունն այն մասին, որ Հայաստանն Ադրբեջանի հետ քննարկում է այն տարածքների վերադարձի հնարավորությունը, որոնք Լեռնային Ղարաբաղի համար վտանգ չեն ներկայացնում:
Հայաստանի արտաքին գերատեսչության պատասխանատուն հրաժարվել է մանրամասներ ներկայացնել, նշելով, որ հակառակ դեպքում բանակցությունները կտապալվեն, գրել էր gazeta.ru-ն եւ հավելել, որ սա Հայաստանի դիրքերի մեղմացման ազդանշանն է, երբ 2016-ի ապրիլից հետո հայկական կողմը ոչ մի կերպ չէր մեկնաբանում տարածքների վերադարձի մասին հարցը: