ՀՀ քաղաքացուն սպառնում է մինչև 2 տարվա ազատազրկում ՌԴ-ում կեղծ վարորդական իրավունքով աշխատելու համար
Հայաստանի Հանրապետության 38-ամյա քաղաքացին Ռուսաստանի Դաշնությունում ստիպված կլինի կանգնել դատարանի առաջ՝ կեղծ վարորդական իրավունք օգտագործելու համար, այս մասին տեղեկացնում է tmn.aif.ru-ն:
2016թ.-ին տղամարդուն վարորդի աշխատանք են առաջարկել Ռուսաստանի տարածքում, վերջինս, սակայն չի ունեցել վարորդական իրավունք և երբեք չի անցել համապատասխան քննություն: Մինչդեռ այդ փաստը խոչընդոտ չի հանդիսացել 38-ամյա հայաստանցու համար, և նա շտապել է «В» կատեգորիայի կեղծ վարորդական իրավունք գնել համացանցի միջոցով:
Վերջին շրջանում տղամարդը բնակվում էր Եկատերինբուրգում: Այս տարվա հուլիսին նա մեքենայով դուրս է եկել Տյումենի մարզի Օմուտինսկի շրջանի ուղղությամբ, որտեղ նրան կանգնեցրել են ճանապարհապարեկային ծառայության աշխատակիցները: ՀՀ քաղաքացու վարորդական իրավունքի վկայականը կասկածներ է առաջացրել ոստիկանների մոտ, ինչից հետո նրան հասցրել են բաժանմունք՝ ճշտումների համար:
Այժմ տղամարդը ստիպված կլինի կանգնել դատարանի առաջ, նրան սպառնում է մինչև երկու տարվա ազատազրկում, տուգանք կամ ուղղիչ աշխատանքներ։