Գործատուն չի կարող աշխատանքից ազատել չթեստավորվելու դեպքում. Ժորա Սարգսյան
Չկա որևէ պահանջ, որի արդյունքում գործատուն կարող է աշխատողին ազատել աշխատանքից, եթե նա չի պահպանել հրամանով նախատեսված պահանջները: Մամուլի ասուլիսի ժամանակ ասաց Աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը՝ անդրադառնալով հոկտեմբերի 1-ից ուժի մեջ մտնող փոփոխություններին:
Ժորա Սարգսյանը նշեց, որ կա հրաման և հստակ նախատեսված ընթացակարգ ու պահանջներ, սակայն Աշխատանքային օրենսգրքով չկա համապատասխան հիմք, որը գործատուին հնարավորություն կտա աշխատանքից ազատել աշխատողին, եթե նա չի թեստավորվել:
«Եթե «Հանրային ծառայության օրենքի» մասին նախագիծն ընդունվի, ապա դրանից հետո հնարավոր կլինի հանրային պաշտոն զբաղեցնող անձանց և հանրային ծառայողների մասով նման կարգավորումներ կիրառել: Այսինքն պահանջել, որ եթե չի պատվաստվում կամ թեստավորվում, ապա ազատվում է աշխատանքից: Իսկ եթե խոսում ենք այն աշխատողների մասին, որոնց հետ կապված աշխատանքային հարաբերությունները կարգավորվում են Աշխատանքային օրենսգրքով, ապա չկա որևիցե կարգավորում և ոչ էլ նախագիծ, որ պետք է փոփոխություն լինի»,-ասաց Ժորա Սարգսյանը: