Գախարիայի հրաժարականը պետք է դիտարկել իշխող կուսակցությունում տարբեր խմբերի միջեւ պայքարով. Վրացագետ
Վրաստանի վարչապետ Գիորգի Գախարիայի հրաժարականը կարող է կապված լինել նաեւ իշխող կուսակցությունում տարբեր տեսակետներ ունենալու հարցով։ Այս մասին NEWS.am-ի հետ զրույցում ասաց վրացագետ Ջոնի Մելիքյանը։
«Իմ կարծիքով Գախարիան էֆեկտիվ մենեջեր էր, ով կարողացավ կորոնավիրուսի ռիսկերը մինիմալիզացնել, արտաքին պարտքի հաշվին սուբսիդավորումներ արեցին, աջակցեցին բնակիչներին ու բիզնեսին։ Ազգային ժողովրդավարական ինստիտուտի կողմից դեկտեմբերին անցկացված եւ հունվարին հրապարակված հարցումների համաձայն՝ Գախարիայի ռեյտինգը համեմատ նոյեմբերի հարցումների, բարձրացել էր, այսինքն՝ հենց Գախարիայի հաշվին իշխող ուժի նկատմամբ աջակցություն կար։ «Վրացական երազանքը» ընտրություններին 150 պատգամավորական մանդատից ստացավ 90–ը եւ պահպանեց պառլամենտական մեծամասնությունը։ Այս պարագայում հրաժարականի ավելի խորը պատճառ կա, որը կապված է Բիձինա Իվանիշվիլիի քաղաքականությունից եւ իր կողմից ստեղծված կուսակցությունից դուրս գալու հետ։ Քանի որ ի սկզբանե, երբ ստեղծվում էր այդ քաղաքական ուժը, տարբեր խմբերի ներկայացուցիչներ էին ընդգրկվում մեջը, եւ առ այսօր իշխող թիմում ձեւավորված են տարբեր ուժային կենտրոններ, որոնցից մեկը Գախարիան էր՝ իր նեղ թիմի հետ, կա Կալաձեի ուժային թիմը եւ այլ թիմեր։ Հիմա այս հրաժարականը պետք է դիտարկենք այդ տարբեր խմբերի միջեւ պայքարով, քանի որ Գախարին իր հրաժարականի տեքստում հայտարարեց, որ հրաժարական է տալիս, որովհետեւ տարաձայնություններ կան իր եւ թիմի միջեւ, որոնց պատճառով կար ստեղծված իրավիճակ, երբ ինքն ավելի մեղմ մեթոդի կողմնակիցն էր, իսկ թիմի հիմնական մասը ավելի կոշտ։ Իմ կարծիքով ինքը ճիշտ որոշում կայացրեց»,– ասաց վրացագետը՝ չբացառելով, որ Գիորգի Գախարիան նաեւ հեռանա կուսակցությունից։
«Հնարավորություն կա, որ ապագայում ինքը կամ կհիմնի նոր քաղաքական ուժ, կամ ինչ–որ մի նոր քաղաքական ուժի կմիանա՝ կապիտալիզացնելու իր վարկանիշը։ Ստացվում է, որ ընդդիմադիր «Միացյալ ազգային շարժում» կուսակցության առաջնորդ Նիկա Մելիայի գործը կատալիզատոր եղավ եւ ցույց տվեց, որ Գախարիան ավելի մեղմ մոտեցման կողմնակից է, իսկ իշխող թիմի մեծամասնությունը՝ կոշտ, եւ այս ամենի արդյունքում ունենք այս իրավիճակը»,– ասաց վրացագետը։
Նշենք, որ Գիորգի Գախարիան իր հրաժարականի ելույթում հայտարարել է, որ հրաժարականի պատճառ է դարձել նաեւ իշխող կուսակցության հետ տարաձայնությունները Նիկա Մելիային կալանավորելու մասին դատարանի որոշման կատարման շուրջ: Հիշեցնենք՝ «Միացյալ ազգային շարժում» կուսակցության առաջնորդ, պատգամավոր Նիկա Մելիան մեղադրվում է խմբակային բռնություն կազմակերպելու եւ մասնակցելու մեջ։
Գիորգի Գախարիայի հրաժարականից հետո էլ, Վրաստանում շարունակվում է ներքաղաքական ճգնաժամը։ Ըստ Ջոնի Մելիքյանի՝ ընդդիմությունը հավաքվել է Նիկա Մելիայի կողքին եւ հայտարարում է, որ թույլ չեն տալու ձերբակալել, չնայած, որ դատարանը կալանավորելու որոշում է կայացրել։
«Հիմա ներքաղաքական ճգնաժամը խորանում է։ Ոստիկանությունը որոշում է կայացրել, որ դատարանի որոշումը իրականացնելու հարցը հետաձգելու են, միգուցե սպասեն նոր վարչապետի նշանակվելուց հետո»,– ասաց վրացագետը՝ հավելելով, որ Վրաստանում շրջանառվում է վարչապետի թեկնածուի մի քանի անուն՝ Արդարադատության նախկին նախարար Թեա Ծուլուկիանի, առաջին փոխվարչապետ Մայա Ցքիտիշվիլի եւ «Վրացական երազանք» կուսակցության ղեկավար Իրակլի Կոբախիձե:
«Թեեւ Գախարիան հայտարարեց, որ իր հրաժարականը կօգնի նվազեցնել բեւեռացումը երկրում, այնուամենայնիվ, ես չեմ կարծում, որ այն որեւէ լուծում կտա, քանի որ ընդդիմությունն այսօր ուրախանում է նրա հրաժարականով, չհասկանալով, որ գուցե հաջորդ վարչապետը ավելի կոշտ քայլեր ձեռնարկի եւ եթե ընդդիմությունը չգնա զիջումների եւ իրենց ապակառուցողական մոտեցմամբ շարունակեն աշխատել, ներքաղաքական ճգնաժամը ավելի խորանա Վրաստանում»,– նկատեց վրացագետը։
Ըստ Ջոնի Մելիքյանի՝ վաղը տեղի կունենա «Վրացական երազանք» կուսակցության քաղխորհրդի նիստը, որտեղ կառաջադրվի վարչապետի թեկնածու, այնուհետեւ երկու շաբաթվա ընթացքում պառլամենտը պետք է հաստատի նրա թեկնածությունը, որից հետո կրկին երկու շաբաթվա ընթացքում վարչապետը պետք է ներկայացնի Կառավարությանը, բայց եթե պառլամենտը չհաստատի վարչապետին ու Կառավարությանը, ապա նախագահը լիազորություն ունի արձակել խորհրդարանը, եւ նոր ընտրություններ նշանակել։