Շուշին բնիկ հայկական է. Քաղաքապետը՝ խորհրդարանում Նիկոլ Փաշինյանի սկանդալային հայտարարության մասին
Շուշին բնիկ հայկական քաղաք է, որը Ադրբեջանի իշխանությունները փորձել են «ազատագրել» հայերից դեռեւս 1960-1970 թվականներին: Այս մասին հունվարի 25-ին լրագրողների հետ հանդիպմանը հայտարարել է ադրբեջանցիների կողմից օկուպացված Շուշիի քաղաքապետ Արծվիկ Սարգսյանը:
Նրա խոսքով՝ 1916 թվականին Շուշիում եղել է 43863 բնակիչ, որից 21926-ը՝ հայեր, 18641-ը՝ թաթարներ, 1249-ը՝ ռուսներ, մնացածը` այլ ազգությունների ներկայացուցիչներ:
«1920թ. մարտի 23-ի գիշերը թուրք մուսավաթականները բարբարոսաբար սպանել էին տասնյակ հազարավոր հայ բնակիչների»,- ասել է Սարգսյանը:
Սարգսյանի կարծիքով՝ այն փաստը, որ վերջին տարիներին Շուշին 90%-ով ադրբեջանական է եղել, «բոլորի համար փաստ դարձավ» միայն 60-70-ական թվականներին, երբ Հեյդար Ալիեւը Ադրբեջանում իշխանության եկավ:
«Նա փորձեց «մաքրել» Շուշին եւ Ղարաբաղը հայերից: Հայ բնակչությունը վտարվեց Շուշիից»,- ասել է քաղաքապետը` հավելելով, որ Շուշին պատմականորեն հայկական քաղաք է եղել, եւ դրա մասին անհրաժեշտ է անընդհատ եւ ամենուր խոսել:
Հիշեցնենք, որ օրերս հանրապետության խորհրդարանում վարչապետ Նիկոլ Փաշինյանն ասել էր, թե բանակցային ողջ գործընթացում չի եղել մի տարբերակ, ըստ որի ադրբեջանցի փախստականները չէին վերադառնալու Շուշի:
«Շուշին հակամարտությունից եւ ազատագրումից առաջ ունեցել է 90 եւ ավելի տոկոս ադրբեջանական բնակչություն։ Ուզում եք ասել, որ 90 եւ ավելի տոկոս ադրբեջանական բնակչություն ունեցող Շուշին հայկակա՞ն է իր այդ կարգավիճակով»,- հայտարարել էր կառավարության ղեկավարը։